DILI, 07 agostu 2024 (TATOLI)–Koordenadór Gabinete Unidade Kurríkulu Nasionál iha Ministériu Edukasaun (ME), João Maupelu, informa, sentru imprensaun Comoro hahú imprime livru ba eskola ensinu sekundáriu jerál sira hodi prepara ba ezame.
“Hau fó ezemplu sekundáriu jerál, livru hotu nível sekundáriu jerál ne’e agora ita prodús iha sentru imprime ona. Ha’u hetan ona informasaun katak iha livru lubuk ida mak prodús iha ne’ebá, ita atu koordena ho sentru impresaun atu haree kuantidade hira, hafoin eskola sira halo pedidu mai ita-nia lojístika sira hodi distribui, tanba ita sei distribui bazeia ba pedidu husi eskola,” Koordenadór hateten ba Agência Tatoli, iha ninia knaar fatin, Vila Verde, kuarta ne’e.
Notísia relevante : ESG Uailili menus livru manuál aprendizajen
Sentru imprensaun prodús kada disiplina iha kopia 13.000, ne’ebé to’o agora seidauk prodús hotu, foin mak 40% husi totál.
“Livru balun distribui sai tiha ona, hein prodús tan fali no agora prosesu la’o hela. Diresaun Unidade Kurríkulu koordena ona ho sentru impresaun hodi konfirma kuantidade hira mak sira prodús ona,” nia akresenta.
Nune’e, pedidu husi eskola mai ne’e hahú distribui sai ba pre-eskolár ne’e livru barak. Kona-ba livru istória balun iha hela armazen (seidauk konfirma kuantidade).
“Ita mós daudaun kontratu hela hodi prodús livru istória, nune’e fim do ano bele distribui hotu. Agora kona-ba jestaun ba livru ne’ebé ita distribui ne’e kada eskola mak hatene tanba kurríkulu halo polítika prodús kontíudu, eskola mak tenke jere oinsá ho fatin ne’ebé biblioteka oinsá hodi jere livru ne’e hodi estudante sira bele uza no bele impresta ba lee, ne’e kompeténsia iha eskola tanba iha eskola liu-liu ensinu bázika sira iha estrutura tolu hanesan Direitór, Adjuntu no GAT ne’ebé iha kompeténsia jere livru ne’ebé ita distribui,” Koordenadór esplika.
Jornalista : Osória Marques
Editora : Julia Chatarina
