Governu-Igreja ofisialmente lansa múzika “Hein Santo Padre”

DILI, 08 agostu 2024 (TATOLI)–Governu liuhusi Sekretáriu Estadu Komunikasaun Sosiál, Expedito Dias Ximenes hamutuk ho Reprezentante Vatikanu iha Timor-Leste, Núnsiu Apostóliku, Monseñor Marco Sprizzi, kinta (08 agostu 2024) ne’e, ofisialmente lansa múzika “Hein Santo Padre” ne’ebé hakerek hosi Pe. Roque Soares da Cruz iha Palásiu Prezidensiál Nicolau Lobato, Bairru Pité, Dili.

Notísia Relevante: Artista timoroan 36 hakerek múzika “Hein Santo Padre” ba Papa Francisco

Sekretáriu Estadu Komunikasaun Sosiál (SEKOMS), Expedito Dias Ximenes, ho Governu da-sia (IX) nia naran hakarak hato’o agradesimentu ba artista timoroan sira hotu ne’ebé hakerek no hananu múzika bazeia ba iha tema vizita amu Papa nian ho tema “Atu imi-nia fiar sai imi-nia kultura”.

“Muzika ne’e la’ós simples maibé nia impaktu boot tebe-tebes iha Timor-Leste, atu ita simu amu Papa. Múzika hanesan meiu ida hato’o mensajen ba públiku kona-ba konteúdu misaun ida-ne’e. Muzika ne’e nia titulu “Hein Santo Padre” katak preparasaun husi joven sira no sarani sira prontu simu sua santidade iha Timor-Leste,” Sekretáriu Estadu Komunikasaun Sosiál ne’e hato’o iha nia diskursu, iha Palásiu Prezidensiál.

Nia esplika, tema vizita Papa Francisco nian iha Timor-Leste mak “Atu imi-nia fiar sai imi-nia kultura” ne’e hatudu ba ema hotu katak kultura timoroan nian mak fiar, respeitu malu no hadomi malu no agradese ema seluk ne’ebé halo di’ak.

“Nune’e, ita agradese ba Amu Roque no kantór timoroan hotu ne’ebé prepara múzika di’ak ba ita hotu no sei públika iha meiu komunikasaun sosiál hotu-hotu, oinsá sarani sira bele hatene no bele rona,” nia hateten.

Kordenadór simu vizita Papa husi igreja, Pe. Guilhermino da Silva, parabeniza kantór sira liuliu sira-ne’ebé hakerek ona múzika ne’e ba eventu importante internasionál no fé nian iha Timor-Leste.

“Hakarak apresia ita-boot sira nia kreatividade ne’ebé halo no hatudu. Imi hahú ohin ba familia no ba ema sira-ne’ebé atu mai hodi hatudu imi-nia fiar no fiar ne’ebé imi iha no fó sasin ba fiar ne’ebé imi iha no kreda ne’ebé imi moris loro-loron nian,” nia dehan.

Bia reforsa, Papa São João Paulo II hato’o ona ba ema hotu iha tinan 35 katak imi konkretiza ona liuhosi muzika ida-ne’e hodi hatudu nu’udar timoroan no fiar Kristu iha Timor-Leste, tan ne’e uma kreda no hanesan komisaun organizadora ba vizita amu Papa nian, apresia ita-boot sira-nia vontade iha preparasaun hein Santu Padre mai Timor-Leste.

Iha fatin hanesan, Koordenadór grupu artista timoroan ba muzika “Hein Santo Padre”, Frances Suny, hato’o agradesimentu ba Arsebispu Arkidioseze metropolitan Dili, Dom Vírgilio Kardeal do Carmo da Silva, SDB, ne’ebé autoriza ekipa hodi bele elabora no fó fiar ba artista timoroan husu dékade 1070 nian to’o agora (2024) hodi bele hananu muzika ba simu Papa Francisco vizita Timor-Leste.

“Agradese mós ba sarani sira hotu ne’ebé sei hananu, ohin ba oin, karik rona no hananu muzika ida ne’e bainhira hala’o atividade preparativu ba vizita santu padre nian. Ha’u-nia agradesimentu profundu husi kolega artista hotu nia fatin no imi-ne’ebé marka prezensa iha ne’e. Karik muzika ladún di’ak, ami hananu ho fuan no fiár, hamutuk ho sarani timoroan ita hein Kristu nia saseluk São Pedro, ita hein vigáriu Kristu nian,” Frances Suny, hatetetn.

Múzika “HEIN SANTO PADRE” ne’e hakerek hosi Pe. Roque Soares da Cruz, hahu husi fulan-maiu 2024 no hetan koresaun husi Arsebispu Arkidioseze Metropolitana Dili, Dom Virgílio Kardeál do Carsmo da Silva, SDB. Múzika ne’e ninia letra kompletu hanesan tuir mai;

“HEIN SANTO PADRE”

Timor Cruz Santa nian

Timor Santa Maria nian

Kreda Timor hein ho laran metin

Roman ksolok Evangellu nian

Husi Ita ami rona lian ida

Menon lia-loos no justisa

Lia domin no dame nian

Lian unidade ba Timor-oan

Iha unidade ami hananu

Knananuk fiar dadolin kmanek

Ba Santu Padre be hit-aan mai