DILI, 08 agostu 2024 (TATOLI)—Ministru Komérsiu no Indústria (MCI), Filipus Nino Pereira, hateten, 2025 Governu planu atu revitaliza merkadu Taibesi sai sentru komersiál ba vendedór no kompradór sira.
Objetivu dahuluk ami mai iha merkadu Taibesi ida-ne’e, haree kondisaun merkadu Taibesi hanesan atividade ekonomia osan sirkula inklui sasan sirakula iha ita-nia fatin ida-ne’e, tanba ne’e mak ita presiza hareee di’ak liután, bele fornese fatin ne’ebé mak dignu ba ita-nia vendedor sira no mós kompradór sira, tanba ami iha planu atu revitaliza merkadu Taibesi sai sentru komersiál ida,” Filipus Nino Pereira, informa ba jornalista sira bainhira tuun direita haree kondisaun merkadu Taibesi, ohin.
“Ita hakarak organiza fatin ne’e bazeia ba tipu atividade negósiu ne’ebé mak vendedór sira halo iha fatin ida-ne’e, tantu ba ai-han nian, roupa nian, no mós ba sasan sira seluk nian ne’ebé mak iha,” nia garante.
Ministru ne’e mós dehan, MCI halo koordenasaun ho ekipa Jestaun Merkadu Munisípiu Dili, atu mantein nafatin koordenasaun servisu inklui mós oinsá mak bele halo jestaun ida ne’ebé mak di’ak liután ba merkadu sira, la’ós iha Taibesi de’it maibé mós iha Manleuana.
“Ita presiza halo dialógu permanente ho vendedór sira iha tempu-badak, nune’e sira mós bele sente katak merkadu ida-ne’e ba sira buka moris nian, atu sira tenke kontribui kuidadu merkadu ida-ne’e ho ambiente ne’ebé mak moos, movimentu transporte tenke di’ak atu labele prejudika fa’an sasan sira ne’ebé mak iha,” nia hateten.
Governu fó ona ona hanoin ba Xefe Departamentu Jestaun Merkadu Taibesi atu haree tempu nune’e bele halo dialógu ho vendedór sira bele asesu ba informasaun depois bele koordena ho vendedór balun ne’ebé mak hadi’ak animál ka hela permanente iha merkadu laran ka aluga tutan fatin sira ne’e presiza haree ida-ne’e, nune’e funsaun merkadu loloos hanesan sentru ba fa’an sosa, nian nune’e ema hotu bele kumpri regra estabelesidu merkadu nian.
Iha fatin hanesan, Xefe Departamentu Jestaun Merkadu Munisípiu Dili, Joaquin Alves hateten katak vizita MCI ne’e atu haree kondisaun sira nune’e ba 2025 bele iha mudansa.
“Ministru nia vizita iha merkadu ne’e diak tebes atu haree kondisaun merkadu nian nune’e ba tinan oin bele hadi’a no iha mudansa se lae vendedór sira kestiona maka’as kona-ba fatin la iha, tanba ita haree vendedór sira kontinua mai no aumenta barak,” Joaquin Alves konsidera.
Nia dehan, vendedor sira iha merkadu Taibesi totál hamutuk 2005, maibé vendedór sira nafatin mai aumenta entaun ho ida nee mak hakarak ba oin tenke hadi’a.
“Entaun ha’u hanesan Xefe Departamentu Jestaun Merkadu Munisípiu Dili fulan tolu ona superiór sira koloka ha’u mai iha ne’e atu jere planu atu ba oin vendedór sira sei la hela iha merkadu laran, hanesan mós ho Manleuana; dadeer mai fa’an lorokraik tenke fila no tinan oin hakarak ga lakohi ita tenke impelmenta ida-ne’e, nune’e merkadu tenke moos no seguru,” nia insiste.
Notísia relevante:MKI entrega dokumentu konstrusaun merkadu modernu foun tolu ba MPIE
Jornalista : Felicidade Ximenes
Editór: Rafael Ximenes de A. Belo
