MAPPF kansela akizisaun ba ró komérsiu
DILI, 08 Agostu 2024 (TATOLI) – Ministériu Agrikultura, Pekuária, Peska no Floresta (MAPPF) deside hodsi kansela planu ba akizisaun ró komérsiu ho kapasidade 350 GT husi Indonézia, tanba ministériu laiha rekursu tékniku atu halo verifikasaun ba planta no kadernu enkargu (BoQ, sigla inglés).
“Ha’u hakarak relata katak kanselamentu sosa ró komérsiu ho kapasidade 350 gross ton [GT] ne’e sei labele kontinua, tanba ministériu seidauk iha kondisaun ne’ebé sufisiente atu akumula ró ida ho nia kapasidade boot”, Sekretáriu Estadu Peska, Domingos dos Santos ‘Maukaro”, informa iha Comoro, ohin.
Ministru Agrikultura, Pekuária, Peska no Floresta, Marcos da Cruz, deside hapara planu ne’e, tanba simu informasaun barak husi parte hotu, nune’e labele fó risku ba governasaun ne’e hodi halo prejuizu ba Estadu.
“Bainhira Ministériu hanoin atu sosa ró ida ho kapasidade boot hanesan ne’e tenke prepara uluk rekursu sira hafoin maka bele iha planu atu sosa. Kuandu seidauk iha kondisaun, di’ak liu bele sosa de’it ró natoon sira hodi apoia peskadór sira-nia atividade”, dehan.
Domingos dos Santos lembra katak, foin lalais, nia bá Malázia depois liu husi Indonézia no konsege hasoru malu ho tékniku sira no fó hanoin katak bainhira atu sosa ró ida ho kapasidade boot tenke iha ona nia infraestrutura, liuliu portu ba peska, tékniku sira ba ró no tenke iha orsamentu atu halo jestaun ba ró.
Liuhusi input sira ne’e, governante ne’e informa kedan ba Ministru Agrikulturano ikus mai ministru mós buka tan informasaun husi parte seluk no deside hodi kansela planu akizisaun ba ró ne’e.
Ho desizaun ministru nian hodi kansela ró ne’e maka muda fali planu ba sosa ró ki’ik ho orsamentu ne’ebé prevee ona ho montante millaun $7-resin. Tanba ne’e, ministériu iha ona planu atu sosa ró unidade 130 hodi apoia ba grupu peskadór sira iha territóriu.
“Husi ró unidade 130 ne’e, iha 40 maka nia prosesu sira hotu ona ho nia orsamentu hamutuk rihun $200-resin maka prevee ona. Espera katak, iha tinan ida ne’e, ministériu bele iha tan ró foun hamutuk 40 hodi tulun tan ba grupu peskadór sira. Agora, iha ró hamutuk unidade 90 maka sei iha hela prosesu aprovizionamentu. Tanba ne’e, seidauk define orsamentu hira maka sei aloka ba ró referidu”, salienta.
Notísia relevante: Peskadór barak lahalo jestaun di’ak ba utilizasaun ró peska – MAPPF
Jornalista: Tomé Amado
Editora: Maria Auxiliadora
