DILI, 08 agostu 2024 (TATOLI)—Ministériu Edukasaun (ME) hahú rezolve kestaun menus profesór no profesór ho idade reforma.
“Ministériu Edukasaun daudaun ne’e atu rezolve mak kona-ba falta profesór no profesór sira ne’ebé mak atu idade reforma. To’o mai iha ohin loron Ministériu Edukasaun liuhusi Diresaun Jerál Ensinu Sekundáriu subtutela Sekretáriu Estadu, ami hala’o ona prosesu levantamentu kuadru pesoál ne’ebé mak hahú iha fulan-juñu no foin daudaun termina ona semana kotuk ikus liu mak viqueque no Rejiaun Administrativu Espesiál Oé-cusse Ambeno (RAEOA),” Diretór Jerál Ensinu Sekundáriu Jerál, Deolindo da Cruz, informa iha ninia knaar fatin, Vila-Verde, kinta ne’e.
Ekipa hatama hotu ona sira-nia dadus mai iha nasionál, nune’e iha tempu badak sira sei tuur hamutuk hodi analiza dadus, ne’ebé profesór sira iha kada nível liu-liu iha eskola Eskola Sekundáriu Tékniku Vokasionál (ESTV) iha kada área.
“Ita sei haree ba área espesializada ezemplu ESTV iha área agrikultura ne’e profesór ba iha disiplina saida hanesan mós iha área sira seluk .Tanba nia natureza ne’e la’ós hanesan ho Ensinu Sekundáriu Jerál (ESJ) no nível seluk. ida-ne’e ita trata pur espesiál tantu ida-ne’e ita sei halo analiza didi’ak pois hotu mak ita sei submete dadus sira iha sistema. Ita rekruta iha área saida-saida no ema hira ita sei hatán dadus ne’e mak ita sei ba aprezenta ba iha eselénsia na’in-rua kuandu aprova ona mak ekipa sei tun hodi implementa prosesu ne’e,” nia akresenta.
Notísia relevante : ME hahú identifika problema menus profesór iha ES no ESTV
Diretora Nasionál Rekursu Umanu hosi Ministériu Edukasaun, Anita Tavares, relata, profesór hamutuk 3.868 maka daudaun ne’e tama ona iha idade idozu, invalidéz no sobrevivénsia maski nune’e sira sei kontinua hanorin estudante sira iha territóriu.
“Ekipa husi Ministériu Edukasaun identifika hotu ona no rekolla ona dadus manorin invalidéz velise no sobrevivénsia iha territóriu mak hamutuk 3.868, ne’ebé husu númeru ne’e kompostu husi feto 1.248 no mane 2.620,” nia tenik.
Profesór sira neʼebé maka ho kondisaun sobrevivénsia hamutuk 827, idozu 2.746 no invalidéz 295. Munisípiu Aileu hamutuk 148, Ainaro 291, Baucau 495, Bobonaro 320, Covalima 292, Dili 717, Ermera 229, Lautém 261, Liquiça 182, Manatuto 168, Manufahi 314, RAEOA 111, no Viqueque 340.
“Ida-ne’e importante no ita bele rezolve ona problema kuandu iha ona dadus, nune’e prosesu rekrutamentu profesór ne’e bele koloka hikas hodi atende ita-nia estudante sira. Dadus ida-ne’e importante tanba eskola sira presiza profesór ne’ebé mak saúde di’ak hodi ensinu, tanba durante ne’e profesór barak mak ho kondisaun saúde la saudável,” nia tenik.
Tuir lei númeru 6/2012 no dekretu-lei númeru 23/2012, funsionáru Ministériu Edukasaun iha rejime jerál ba funsionáriu administrasaun no rejime espesiál ba profesór sira.
Aleinde ne’e, parte nasionál kontinua koordena ho diretór edukasaun munisipál nune’e bele atende eskola ne’ebé menus manorin.
“Agora ita hasoru problema mak menus profesór, ita koordena hela diretór munisipál sira atu haree sira-nia karga-oráriu ne’e. Ida ne’ebé mak karga-oráriu sei menus bele reforsa fali ba eskola ne’ebé mak menus profesór no iha tempu hanesan iha posibilidade ita mós halo kolokasaun ba profesór sira iha nível munisipál sira atu reforsa profesór sira ne’ebé mak sei menus,” nia katak.
ME koordena ho Diretór Servisu Munisípal Edukasaun sira atu sira halo ezersísiu ida, nune’e responde ona eskola ida iha Afolokai, munisípiu Viqueque
Jornalista : Osória Marques
Editora : Julia Chatarina
