DILI, 08 agostu 2024 (TATOLI)—Parlamentu Nasionál (PN), hahú loké prémiu liberdade eapresaun Max Stahl 2024 ba públiku, nune’e ba interresante sira bele kompete hodi aprezenta proposta kandidatu husi loron 12-18 agostu 2024 ne’e.
Notísia Relevante: OPMT sai manán-na’in ba prémiu liberdade espresaun Max Stahl
“Períodu atu aprezenta proposta kandidatura entre 12-18 agostu 2024,” refere nota ne’ebé Agência TATOLI asesu husi mídia Parlamentu Nasionál, kinta ne’e.
PN estabelese prémiu ba liberdade espresaun Max Sthal, nu’udar omenajen ba saudozu jornalista nia kontribuisaun ba Timor-Leste no atu promove liberdade espresaun, liuhusi rezolusaun númeru 25/2021, 01 dezembru, ne’ebé altera ho rezolusaun númeru 21/2024.
Prémiu Max Stahl buka atu rekoñese no valoriza atividade husi sidadaun sira, entidade ka organizasaun naun governamentál sira ho orijen husi rai-laran ka rai-li’ur ne’ebé kontribui makaas ba prémiu Max Sthal nia objetivu sira.
Obra sira no sira-nia autór, individuál ka koletivu ne’ebé hakerek, ko’alia ka audivizuál ho natureza hanesan jornalizmu, sinema, literatura ka siénsia.
Prémiu nia objetivu mak rekoñese no valoriza sira-ne’ebé fó kontribuisaun relevante atu promove no halekar ka defende liberdade espresaun no informasaun no liberdade imprensa, inklui prevene no fó sai bainhira liberdade sira-ne’e hetan violasaun.
Objetivu seluk mak atu mantein memória fó sai no eduka kona-ba istória resente rezisténsia Nasionál ka luta libertasaun nasionál nian.
Sé-sé mak sai kandidatu, nia dehan, iha Deputadu sira PN, bankada Parlamentár no kualkér ema ka organizasaun ida ho orijen husi rai-laran no rai-li’ur bele aprezenta kandidatura sira ba prémiu Max Sthal.
Kandidatu bele sidadaun Nasionál ka estranejiru, organizasaun naun governamentál ka entidade seluk ruma.
Tipu materiál ba kandidatu sira tenke aprezenta mak informasaun kona-ba atividade sira-ne’ebé iha objetivu relasiona ho objetivu sira prémiu nian ka serbisu individuál ou koletivu oioin bele ho natureza jornalizmu, literatura, siénsia ka audivizuál ne’ebé relasiona ho objetivu prémiu nian.
Notísia Relevante: PN aprova projetu rezolusaun institui prémiu Max Stahl
Jornalista : Nelson de Sousa
Editór : Cancio Ximenes
