DILI, 08 agostu 2024 (TATOLI)—Prezidente Parlamentu Nasionál, Maria Fernanda Lay, kinta ne’e, realiza reuniaun lidér bankada hodi diskute ajenda atu realiza plenária ba sesaun solene espesiál ba komemorasaun loron konsulta populár ba da-25 (30 agostu 1999-30 agostu 2024) ne’ebé sei marka prezensa husi Sekretáriu Jerál Nasaun Unida (ONU), António Guteres.
Notísia Relevante: PN sei realiza sesaun solene ba Sekretáriu Jerál ONU
“Prezidente Parlamentu konvoka reuniaun ho líder bankada sira hodi haree ajenda konvokatóriu plenária solene hodi selebra tinan 25 ba konsulta populár iha 30 agostu ho prezensa Sekretáriu Jerál ONU nian. Ita hatene selebrasaun loron ne’e monu loos iha resesu Parlamentu nian, hanesan baibain resesu Prezidente Parlamentu bele konvoka plenária estraordináriu, entaun ohin konfirma ona mezmu iha resesu meza Parlamentu no lidér bankada sira konkorda atu Deputadu sira hotu mai iha sesaun solene,” Vise Ministru asuntu Parlamentár, Adérito Hugo da Costa, hateten ba jornalista sira hafoin partisipa reuniaun lidér bankada iha PN.
Sesaun solene ne’e sei iha diskursu husi Sekretáriu Jerál ONU, António Guterres no sei iha intervensaun husi bankada Parlamentár sira.
Governante ne’e hateten, eventu ida Estadu nian ba selebrasaun loron konsulta populár ida mak sesaun solene no no sekuénsia sira seluk hanesan iha Dili sei hala’o iha estádiu munisipál Dili.
Governu mós realiza komemorasaun ba iha territóriu laran tomak no sei destaka membru Governu sira sei prezensa iha nível postu hotu hodi selebra loron konsulta populár ne’ebé tuir orientasaun Primeiru-Ministru nian katak komemorasaun ne’e povu nian halo fali reflesaun ba tinan 25 referendu ninian no valoriza nafatin loron ida desizivu tebes ba Timor-Leste nia luta tinan 24 ba ukun rasik aan
Jornalista : Nelson de Sousa
Editór : Cancio Ximenes
