DILI, 09 agostu 2024 (TATOLI)—Banku Sentrál Timor-Leste (BCTL, sigla portugés) sesta ne’e, lansa relatóriu trimestrál Fundu Petrolíferu Timor-Leste nian, hahú husi loron 01 abríl to’o 30 juñu 2024.
Relatóriu ne’e hatudu katak Fundu Petrolíferu nia kapitál sa’e oituan ba biliaun $18,47 iha trimestrál daruak, kompara ho iha trimestre dahuluk nia rohan ne’ebé akumula biliaun $18,45, hafoin ajusta ‘fair value’ dívida privada ba tinan 2023.
“Relatóriu ne’e mós hatudu katak totál reseita ne’ebé ita simu iha trimestre ne’e hamutuk millaun $11,80, rendimentu brutu husi investimentu fundu hamutuk millaun $214,42, kompostu husi kupaun no dividendu ne’ebé simu mak millaun $131,83 no mudansa iha valór merkadu nian millaun $76,33,” Diretór Ezekutivu BCTL, Tobias Ferreira, hateten, iha ninia knaar fatin, BCTL, Akait.
Notísia relevante : Fundu Petrolíferu biliaun $18,45 iha trimestre dahuluk 2024
Rezulta rendimentu ba karteira fundu nian durante trimestre ne’e 1,21% ba portifóliu kompara ho rendimentu sasukat (benchmark) nian ba períodu ne’e mak 1,31%.
Kona-ba fundu ne’e rasik espesifika katak jestór operasionaál BCTL mak hanesan ajente responsável ba jestaun operasionál Fundu Petrolíferu no Ministériu Finansa mak responsabiliza atu estabelese estratejia investimentu tomak kona-ba fundu ne’e nian.
BCTL jere ona portofoliu besik liu ho pontu referénsia iha trimestre da-75 dahuluk, diferénsia entre retornu totál portofóliu no pontu referénsia iha períodu ne’e negativu 0,11 pontu de base ka negativu 11%.
Dezempeñu retornu fundu hahú husi inísiu 4,35%
Pontu importante husi relatóriu trimestre ba dala-LXXI, ne’ebé kobre períodu 01 abríl to’o 30 juñu 2024, inklui kapitál fundu mak biliaun $18,47, osan kontadu brutu fundu tama husi kontribuisaun kontribuinte, hamutuk millaun $11,80.
Enkuantu, osan kontadu líkidu ne’ebé sai husi fundu durante trimestre ne’e hamutuk millaun $203,70, kompostu husi millaun $200 transfere ba orsamentu Estadu no millaun $3,70 kobre kustu jestaun nian.
Rendimentu totál portofóliu fundu nian iha trimestre ne’e mak 1,21%, enkuantu rendimentu sasukat (benchmak) iha períodu ne’e mak 1,31%. Rendimentu portofóliu instrumentu merkadu finanseiru iha períodu ne’e mak 1,21%, kompara ho rendimentu referénsia mak 1,32%.
Iha fatin hanesan, Xefe Investimentu Fundu Petrolíferu BCTL, Agostinho Maia, hateten, fatór ne’ebé afeta ba dezempeñu investimentu fundu iha trimestre ida-ne’e, liu-liu ba makro ekonomia globál nian mak hanesan, kresimentu ekonomia globál kontinua aumenta nafatin maibé ladún maka’as tanba iha presaun taxa de juro globál ne’ebé mak agora sei elevadu tebes.
Iha Estadu Unidu Amérika ezemplu kresimentu ekonomia aumenta de’it 1,4% iha trimestre dahuluk nian, ne’ebé tun husi 3,4% mak rekorda iha períodu outubru dezembru iha trimestre kotuk.
Husi merkadu empregu nian, haree katak númeru empregu forte nafatin nune’e ekonomia kontinua kria empregu foun ho númeru ne’ebé a’as.
Inflasaun iha Estadu Unidu Amérika tun kompara ho tinan rua kotuk tun maka’as husi 9% ba 3%, maibé nível ne’e sei dook husi BCTL nia alvu 2%, ne’ebé sai hanesan alva ba BCTL Estadu Unidu Amérika.
Tanba ne’e, durante trimestre ne’e Banku Sentrál Estadu Unidu Amérika kontinua mantein sira-nia taxa de juro iha nível 5,25% to’o 5,50%.
Iha parte rejiaun Europeia nian, Banku Sentrál hahú iha konfiansa ba númeru inflasaun katak, karik inflasaun sei tun, tanba ne’e mak durante trimestre ne’e, sira hatun sira-nia taxa de juro iha fulan-juñu.
Iha kresimentu ekonomia nian, hahú hetan kresimentu pozitivu nafatin maibé ladún maka’as tuir dadus ne’ebé iha.
Ho fatór sira ne’e mak afeta ba dezempeñu investimentu sira iha equity, ezemplu equity iha trimestre ida-ne’e hetan dezempeñu pozitivu maibé kontribuisaun ne’e maihusi equity dezempeñu serbisu Estadu Unidu Amérika pozitivu.
Maibé, iha rejiaun Europeia nian hetan dezempeñu negativu durante trimestre ne’e tanba afeta husi eventu polítiku sira iha rejiaun, liu-liu eleisaun ne’ebé boot mak akontese iha Fransa durante trimestre ne’e.
Jornalista : Arminda Fonseca
Editora : Julia Chatarina
