PR Horta-KSDS diskute medida seguransa durante vizita Papa Francisco iha TL

DILI, 09 agostu 2024 (TATOLI)—Prezidente Repúblika, José Ramos Horta, sesta ne’e, iha Palásiu Prezidensiál Dili, hasoru malu ho Konsellu Aas Defeza no Seguransa (KSDS), hodi ko’alia kona-ba seguransa durante vizita Papa Francisco iha Timor-Leste.

Portavós KSDS, João Aparício, hateten katak enkontru ne’e la marka prezensa hosi Primeiru-ministru Kay-Rala Xanana Gusmão tanba obstákulu saúde nian.

“Durante enkontru ne’e, Ministru Justisa Sergio Hornai hetan pose nu’udar KSDS, no iha enkontru ne’e iha diskusaun espesífiku liu kona-ba medida seguransa atu proteje líder sira ne’ebé atu vizita TL, ne’ebé foka liu ba Papa Francisco nia vizita mai Timor-Leste,” Portavos KSDS ne’e hateten ba jornalista sira.

Timor-Leste, nu’udar nasaun independente, bainhira líder mundiál sira mai vizita Timor-Leste, tenki prepara atu nune’e bele garante seguransa durante vizita.

Enkontru ne’e partisipa husi Ministru Agio Pereira reprezenta Primeiru-ministru Kay-Rala Xanana Gusmão, Ministru Negósiu Estranjeiru no Kooperasaun, Bendito dos Santos, Ministru Interiór Francisco da Costa Guterres, Ministru Justisa Sergio Hornai.

Alende ne’e, reprezentante husi membru Parlamentu Nasionál hanesan David Mandati Dias Ximenes, Duarte Nunes, no mós Tenente Jerál F-FDTL Falur Rate Laek, Komisáriu Jerál, Komandante PNTL Henrique da Costa, Diretór-jerál Ajénsia Intelijénsia Nasionál Longuinhos Monteiro, Julio Tomás Pinto (reprezenta husi Prezidente Repúblika), Nuno Manuel Corvelo de Andrade Sarmento (Reprezenta husi Prezidente Repúblika).

Notísia relevante:Xefe Estadu ho Governu kontinua diskute kestaun seguransa vizita Papa Francisco-Sekjer ONU

 Jornalista: Hortencio Sanchez

Editór: Rafael Ximenes de A. Belo