DILI, 08 agostu 2024 (TATOLI) – Ministru Prezidente Konsellu Ministru (MPKM) Agio Pereira, kinta ne’e, iha Palásiu Prezidensiál Dili, hasoru malu ho Prezidente Repúblika, José Ramos Horta, hodi diskute kona-ba kestaun seguransa durante vizita Papa Francisco, inklui vizita Sekretáriu Jerál Nasaun Unidas (Sekjer-ONU), António Guterres no komemorasaun 30 agostu, loron Konsulta Populár.
“Loloos ohin Primeiru-Ministru mak mai hasoru malu ho Prezidente Repúblika, maibé tanba Primeiru-ministru iha reuniaun ida kona-ba seguransa nian, delega de’it ha’u mak mai hasoru malu ho Prezidente Repúblika hodi ko’alia kona-ba kestaun seguransa durante vizita Papa Francisco no atividade boot sira hanesan vizita Sekretariu Jerál Nasaun Unida no aniversáriu 30 agostu,” Ministru Agio hateten, hafoin remata enkontru.
Nia dehan, Governu sei esforsu másimu atu koordena hodi organiza ba vizita Papa Francisco no eventu importante seluk atu bele la’o ho susesu.
“Xefe Estadu satisfeitu ho progresu ne’ebé mak Governu halo. Agora daudaun Primeiru-Ministru enkontru hela ho Ajénsia relevante seguransa nian hodi bele sinkroniza ho Prezidente Repúblika,” nia tenik.
Governante ne’e hatutan, daudaun ne’e Governu koordena di’ak tebes ho parte igreja no seluktan halo preparasaun ne’ebé másimu tebes hodi hasoru eventu bo’ot hira ne’ebé sei akontese iha fulan-agostu-setembru tinan ne’e.
Kona-ba kestaun seguransa, sei la’o ho di’ak tanba Polísia Nasionál Timor-Leste (PNTL) ho Falintil-Forsa Defeza Timor-Leste (F-FDTL) koopera di’ak tebes no fó seguransa ho susesu ba atividade hirak ne’e.
Notísia relevante:Komandu F-FDTL no PNTL garante laiha perturbasaun iha ámbitu vizita Amu Papa
Jornalista: Hortencio Sanchez
Editór: Rafael Ximenes de A. Belo
