VIQUEQUE, 09 agustu 2024 (TATOLI)-Servisu Sekretáriu Estadu Formasaun Profesionál no Empregu (SEFOPE) hamutuk autoridade munisípiu Viqueque, sesta ne’e lansa, konstrusaun morru protesaun ba Sentru Formasaun Profesionál (SFP, sigla portugés) Beaço, suku Maluru, postu administrativu Viqueque, munisípiu Viqueque.
Reprezentante SEFOPE, Pascoal da Cruz, hateten, SEFOPE koopera ho Sentru Formasaun Profesionál tinan-2014 konstrusaun uma ba sentru formasaun, morru, ho ninia kontinuasaun maka agora konstrui morru hodi asegura ba fasilidade, edifísiu no estudante sira iha sentru ida-ne’e.
“Oin loron ita konstrui tán morru protesaun ba sentru Beaço, depois morru ne’e hotu ita sei kompleta fasilidade ba sentru liuliu formadór, ekipamentu formasaun sira. Tanba ami haree sentru formasaun Beaço buat barak mak sei menus, maibé ha’u fiar ba futuru ita sei rezolve sentru ida-ne’e,” Pascoal da Cruz, hateten ba Agência Tatoli, iha sentru formasaun Beaço, ohin.
Pascoal dehan, sentru SFP Beaço benifísia joven sira iha munisípiu Viqueque hodi hasa’e sira-nia koñesementu área formasaun oi-oin hodi liga ba merkadu servisu sira. “Entaun ita presiza mellora di’ak liután sentru formasaun ida-ne’e hodi fornese formasaun ida ne’ebé kualidade, nune’e forma ba ita-nia joven sira kompete iha kampu servisu,” nia hato’o.
Iha fatin hanesan, Sekretáriu Asuntu Sosiál munisípiu Viqueque, Acacio de Sousa, hateten, ba konstrusaun morru ba SPF Beaço autoridade lokál no komunidade sira tenke asegura atu konstrusaun ida-ne’e bele finaliza tuir tempu servisu.
“Ha’u husu empreza responsavel sira tenke servisu ho responsablidade, labele husik abandona serbisu. Empreza sira Governu fó ona fiar tenke servisu tuir durasaun kontratu no garante kualidade hodi responde ba ita-nia joven sira-nia nesesidade”, nia subliña.
Iha biban ne’e, Diretór Ezekutivu Sentru Formasaun Profesionál Profesionál (SFP) Becora, Bernadeta Pinto Miranda Gomes, Xefe suku Maluro, Bendito Soares, husu autoridade munisípiu Viqueque reforsa konstrusaun morru no empreza hala’o knaar ho responsablidade.
“Tanba sentru ida-ne’e iha ita-nia área no sei benifísia ba ita-nia joven sira, iha munisípiu ida-ne’e. Nune’e ba konstrusaun morru ne’e importante tebes hodi proteje estudante sira proteje fasilidade. Tanba ne’e, ha’u husu ita hotu-nia kolaborasaun no kontribuisaun atubele responsavél sentru ida-ne’e”.
Tuir dadus, formadór iha SFP Beaço hamutuk na’in-14 no estudante na’in-30, área formasaun maka hanesan Karpintária, kanalizasaun, Soldadura, eletrisidade no pedreiru.
Iha oportunidade ne’e, Diretór CHVA unip LDA, Bernardo Quintao, kompremente CHVA unipa LDA sei servisu tuir kontratu no tempu serbisu ne’ebé fó ba empreza nune’e empreza sei hala’o servisu ho responsabilidade hodi garante kualidade.
“Kontrusaun morru ida-ne’e ami sei responsabliza hodi halo serbisu to’o finaliza tanba ami iha esperiénsia servisu no ami iha rekursu ne’ebé ho kualidade. Daudaun ne’e, ami iha traballadór na’in-20 no sei apoiu husi komunidade sira iha suku Maluru hodi reforsa servisu,” nia garante.
Enkuantu, konstrusaun morru haleu SFP Beaço ho totál ektare 1.5 ne’ebé gasta $122.000 ba obra referida fahe ba empreza rua maka responsavél konstrusaun. Konstrusaun kada empreza ida konstrui morru 750 metru ho durasaun ne’e sei gasta orsamentu hamutuk $61.000.00. Durasaun servisu fulan lima hahú fulan-agostu no finaliza iha fulan-dezenbru. Konstrusaun ne’e konstrui husi Empreza Finlos Unip LDA no Empreza Sebas Unip ADA, morru hale’u SFP Beaço.
Entretantu, partisipa iha lansamentu morru haleu SFP Beaço ne’e hetan partisipa husi diretór SEFOPE Viqueque, Diresaun Terras Propriedade, Polísia Nasionál Timor Leste (PNTL), autoridade suku Maluru, lia-na’in suku Maluru, formadór SFP Beaço no estudante SFB Beaço.
Jornalista : Vitorino Lopes da Costa
Editór : Rafael Ximenes de A. Belo
