BOBONARO, 12 agustu 2024 (TATOLI) – Eletrisidade Timor-Leste, Empreza Públika (EDTL,EP) planeia implementa Projetu Eletrifikasaun Komunitária (PEK) ba bairru iha aldeia Mude, Berleu, Liabote, suku Meligo, inklui bairru balu iha suku Da-udu, postu administrativu Cailaco, munisípiu Bobonaro ne’ebé durante ne’e seidauk asesu liña eletrisidade.
Supervizór EDTL,EP Munisípiu Bobonaro, Mário de Jesus, relata iha tempu badak ekipa tékniku-sira sei ba halo levantamentu dadus iha terrenu atu bele identifika uma-kain hira mak seidauk asesu eletrisidade.
Notísia relevante: Xefe família 30 iha Liabote kontinua sunu Kamí hodi hetan naroman
“Servisu ida-ne’e ami EDTL rasik mak sei foti, ami tau ba iha liña komunitária, EDTL servisu hamutuk ho povu, ahi ida-ne’e ita atu foti iha parte Asalau, lori media-tensaun tanba ita-nia kliente lubuk iha-ne’ebá, entaun ami tenke ser lori media-tensaun ba to’o Poerema, nune’e mós bairru balu iha suku Da-udu,” nia informa ba Agência TATOLI, iha kna’ar fatin, segunda ne’e.
Durante ne’e EDTL seidauk tau prioridade atu lori liña eletrisidade bairu-bairu tanba sei foku ba aldeia 12 iha munisípiu Bobonaro ne’ebé daudaun ne’e implementa hela projetu eletrifikasaun komunitária inklui Projetu Eletrifikasaun Nasionál.
“Ha’u hatete iha tinan ida-ne’e, EDTL sei esforsu tomak atu lori naroman ba ita-boot sira-nia fatin, tantu aldeia no bairru,” Mário de Jesus akresenta.
Xefe suku Meligo, Duarte Perreira, husu ba governu liuhosi EDTL asu aselera prosesu, tanba hafoin Timor-Leste ukun-aan durante tinan 20-resin ona abintante-sira iha Poerema, aldeia Liabote no Mude sei kontinua hela iha nakukun laran.
“Ha’u-nia komunidade tinan barak ona la asesu eletrisidade, sira sunu de’it mak ahi-oan, dalaruma sira dezaraska buka tenaga suriah hodi uza, sira halerik mai ha’u dehan ami ne’e bainhira loos mak asesu ba eletrisidade, sira hateten mai ha’u dehan uluk mós ami iha nakukun, ukun-aan mós ami iha nakukun,” nia katak.
Xefe aldeia Mude, Rui Avelino, esplika problema ne’e difikulta estudante sira atu estuda no família sira atu halo atividade iha tempu kalan.
“Ami iha-ne’e han hamutuk, inan-aman ho oan família tomak iha uma laran ami nahe biti iha rai, ami sunu de’it lampu-oan tula iha ai-leten derrepenti laho halai kona ahi ne’e monu tún mai, ahi nakukun,” nia tenik.
Xefe aldeia Laibote, Rodolfo Abel, sente triste tanba Poerema hanesan fatin sentru ba Falintil sira halo gerilia hodi reziste hasoru forsa Indonézia nian to’o ukun-an seidauk asesu eletrisidade.
“Ami iha Poerema sei nakukun ba eletrisidade, ne’ebé EDTL bele haree took ba ami-nia ahi ne’e, atu oinsá ami-nia komunidade bele hetan naroman lalais,” nia hateten.
Xefe suku Daudu, Antonino Maria Soares, sente kontente tanba 99% komunidade suku Daudu asesu ona enerjia elétrika maibé iha uma-kain 11 no xefe família 16 mak sei kontinua hela iha nakukun laran.
“Ne’ebé ami husu EDTL,EP haree took oinsá ami-nia komunidade-sira ne’ebé mós bele hetan naroman hanesan sira seluk,” nia katak.
Enkuantu daudaun ne’e EDTL emplementa hela projetu eletrifikasaun komunitária iha aldeia Mahui, Daitete, Riti-Udu, Lugululi no daudaun ne’e iha ona prosesu konkursu públiku atu implementa projetu eletrifikasaun nasionál ba aldeia Mabelis, suku Leber no aldeia seluk tán iha postu administrativu Lolotoe.
Notísia relevante: EDTL fornese ona enerjia elétrika ba uma-kain 1,676 iha Bobonaro
Jornalista: Sérgio da Cruz
Editór: Evaristo Soares Martins
