MALIANA, 27 jullu 2023 (TATOLI)-Família hamutuk uma-kain 30 iha aldeia Liabote, suku Meligo, postu administrativu Cailaco, munisípiu Bobonaro, kontinua sunu Kamí hodi hetan naroman iha tempu kalan.
Xefe aldeia Liabote, Pasqual Lelo-Bere, hateten situasaun araska liután tanba atu hetan Kamí musan ida ka rua obrigatouriu komunidade sira tenke la’o ho distánsia dook.
Notísia relevante: Xefe suku Atudara husu IGE kotinua mellora dalan Poerema ba Cailaco
“Tempu bailoro sira ba lalin Kamí, depiois sira mai habai maran, tuku harahun, sira fai ho kabaas Timor depois kumu, buka ai-maran iha duut laran depois sira kumu hanesan lilin mak sunu halo lakan, sira iha ne’ebá bairru Poerema, aldeia Liabote totál xefe família 30 mak la asesu elétrika,” nia informa ba jornalista sira iha Cailaco Vila, kinta ne’e.
Problema refere autoridade lokál sira hato’o beibeik ba Governu liuhosi Eletrisidade Timor-Leste, Empreza Públika (EDTL,E.P) maibé to’o agora seidauk iha resposta.
“Ha’u hanesan autoridade lokál sei kontinua ezije tanba dadus haruka ba tiha ona. Ami-nia komunidade preokupa tebes, kalan ami-nia oan sira kalan atu estuda de’it mós ladi’ak, ami atu ko’alia adat nian mos tuur iha nakukun de’it,” nia haktuir.
Xefe suku Meligo, Amancio Barreto da Conceição, hatutan alende uma-kain 30 iha Liabote, komunidade iha aldeia Mude no aldeia balun mós eidauk asesu eletrsidade liuliu sira-ne’ebé hela liu iha área rurál.
“Sira uza ahi-oan sunu, balun mós uza solar sél, ne’e sira rasik sosa. Ida-ne’e ha’u haree difikulta tebes ba labarik sira atu estuda, tanba ne’e ha’u husu Governu se bele haree lalais problema ne’e, tanba tinan 20-resin ona ha’u-nia komunidade barak sei hela iha nakukun laran,” nia hateten.
Enkuantu tuir dadus suku Meligo iha aldeia haat, komposta hosi Mude, Berliu, Daulete no Liabote, ho totál populasaun na’in-3,518 ho xefe família 800-resin.
Notísia relevante: EBF Poerema didin de’it ho bebak
Jornalista: Sérgio da Cruz
Editór: Evaristo Soares Martins
