BOBONARO, 23 setembru 2022 (TATOLI)-Xefe suku Atudara, postu administrativu Cailaco, munisípiu Bobonaro, Manuel Ximenes, husu Institutu Jestaun Ekipamentu, Institutu Públiku (IGE,IP, sigla portugés) atu kontinua meliora dalan hosi área Poerema, aldeia Liabote, suku Meligo ba to’o Cailaco.
Nia dehan, iha semana rua liubá Ministériu Obra Públika orienta IGE mobiliza ekipamentu pezadu hadi’ak ona dalan hahú hosi área Hali-Mesak, aldeia Anahun, suku Odomau, postu administrativu Maliana, ba to’o Poerema ho distánsia kilómetru 12.
Notísia relevante: Aldeia rua iha Atudara seidauk asesu eletrisidade
“Ami husu atu kontinua hadi’a, taka estrada ku’ak ne’e hosi Poerema liuhosi foho Lesu-Luli nia hún ba sai iha Cailaco Vila,” Xefe suku Atudara ko’alia iha ámbitu diálogu nasionál entre oranizasaun sosiedade sivíl ho VIII Governu, ne’ebé realiza iha Foho Loe-Lacu, área Poerema, aldeia Liabote, suku Meligo, postu administrativu Cailaco, munisípiu Bobonaro, sesta ne’e.
Ministériu Obra Públika presiza loke dalan foun ba uma lisan Haurema, Osa-ubun no Atudei-Sisilete ne’ebé forma iha dalan ninin hosi suku Meligo nian ho distánsia kilómetru neen liuhosi bairru Asalau, aldeia Mude ba sai fali iha suku Manapa, besik mota Bulu.
Nune’e mós presiza halo normalizasaun ba mota sira iha parte rai tetuk iha aldeia Daulelu, suku Meligo ne’ebé kada tinan sempre akontese inundasaun rezulta mota sobu estraga komunidade nia natar, to’os no hela-fatin.
IGE presiza halo normalizasaun ba mota Cla-ola, no suku Goulolo ne’ebé ninia aldeia Suri-Ubu hela iha área Turema, besik mota Aidenu ne’ebé sempre fó risku ba populasaun sira-nia vida.
Hatán ba preokupasaun ne’e, Prezidente Konsellu Administrasaun, Hermenegilda da Costa Laurentina, agradese ba xefe suku Atudara ne’ebé hatene no rekoñese komunidade nia preokupasaun ne’ebé enfrenta durante ne’e, nune’e nia promete sei konidera kestaun ne’e iha tempu badak hodi solusiona.
“Ha’u hanoin ba preokupasaun nai xefe suku nia ne’e ami anota, fiar katak IGE sei apoia fila-fali, tanba agora ekipa IGE serbisu destaka hela iha Ai-Asa ho Lolotoe, depois ida-ne’e ami sei mai fila fali iha fatin ida-ne’e, ne’ebé husu ba xefe suku sira atu hakbesik-aan ba IGE halo liña koordenasaun no husu informasaun atubele ezekuta serbisu ne’e,” nia hateten.
Tuir dadus monografia munisípiu Bobonaro iha 2022, postu administrativu Cailaco, iha suku ualu, aldeia 24 ho totál populasaun 13,906, kompostu hosi mane 7,648, feto 6,258, ho totál xefe família 7,648, ho área luan 184,38 km².
Notisia Relevante:Rai-rahun falun estrada Cailaco provoka komunidade sofre moras IRA
Jornalista: Sérgio da Cruz
Editór: Evaristo Soares Martins
