BOBONARO, 24 setembru 2021 (TATOLI)—Populasaun hosi aldeia Atubuti ho Tuturema, postu administrativu Cailaco, munisípiu Bobonaro, to’o oras-ne’e seidauk asesu eletrisidade.
“Aldeia rua ne’ebé la asesu eletrisidade iha liu área rurál inklui suku balun ne’ebé hela besik aldeia rua ne’e,” Xefe suku Atudara, Manuel Ximenes, informa ba jornalista iha Kámara Dioseze Maliana, sesta ne’e.
Notísia relevante:Estrada ligasaun Lolotoe-Maliana aat
Komunidade ne’ebé iha kb’it natón sosa rasik Solar panel, maibé sira ne’ebé kapasidade ekonomia mínimu sunu de’it lampariña iha tempu kalan.
Autoridade lokál ne’e aprezenta beibeik ona situasaun ne’e ba Governu desde tinan 2012, no konsege responde hodi distribui solar panel, maibé la dura ba tempu naruk.
Iha 2012 Governu oferese solar panel unidade 25, iha 2013 oferese unidade 25, iha 2014 oferese 25, maibé la dura kleur tanba área rurál ne’e udan ho anin bebeik halo sasan sira ne’e aat hotu.
Durante ne’e, nia akompaña katak, komunidade ejizu bebeik ba autoridade lokál tanba hakarak atu asesu informasaun hosi nasionál liu hosi televizaun, inklui fasilita oan sira estuda iha tempu kalan, maibé difísil.
Nia sujere nafatin ba Governu atu tau problema ne’e ba iha planu Orsamentu Jerál Estadu (OJE) 2022, nune’e komunidade bele asesu naroman.
Totál populasaun iha aldeia, Atubuti no Tuturema ne’ebé seidauk asesu eletrisidade hamutuk 725 no totál uma-ka’in 200-resin.
Jornalista: Sérgio da Cruz
Editór: Cipriano Colo
