DILI, 12 Agostu 2024 (TATOLI) – Ministériu Agrikultura, Pekuária, Peska no Floresta (MAPPF) halo ona akizisaun ba tratór médiu hamutuk unidade 25 hodi disponibiliza ba munisípiu sira.
Diretór Nasionál Ortikultura, Lúcio Ramiro Ribeiro, haktuir katak, iha 2024 ne’e, Ministériu Agrikultura distribuiu antes ona ekipamentu agríkola hanesan tratór médiu hamutuk 25 (sosa ho osan rihun $450), hands tractor 400 (rihun $700), mákina ko’a hare 30 no behu batar 30 (sosa ho osan rihun ida).
Maske ferramenta agríkola sira ne’e iha ona, maibé seidauk sufisiente atu apoia ba natar sira iha territóriu, tanba ne’e tuir orientasaun Ministru Agrikultura, Marcos da Cruz, nian tenke aumenta tan tratór foun atu distribui ba munisípiu sira hodi fila rai potensiál sira ne’ebé sei abandona, nune’e bele hasa’e produsaun iha rai-larasn.
“Ita mós sosa tan ona tratór médiu hamutuk unidade 25. Prosesu pagamentu remata ona no agora tratór sira ne’e iha ona ita-nia liman, hein de’it ita atu realiza serimónia hodi entrega ba munisípiu sira”, Lúcio Ribeiro hateten iha Comoro, ohin.
Tratór ne’e sei fahe ba munisípiu sira ne’ebé poténsia ba natar no to’os, inklui sira ne’ebé maka tinan kotuk seidauk hetan tratór hanesan Lautém no Aileu hodi hakmaan serbisu agrikultór sira-nian atu kuda hare no ai-han sira seluk.
Tratór ne’e sosa husi empreza Bandido Qualidade (BQ) Corporation ho orsamentu ne’ebé prevee iha 2024 ho totál rihun $850.
Lúcio Robeiro adianta katak, tinan ida ne’e, terrenu ektare 1.200-resin ne’ebé kategoria abandonadu, rihun 39-resin halo ona espansaun no rihun 40 maka ativu ona hodi halo atividade agríkola.
“Husi estimativa ba rezultadu produsaun ne’ebé iha, kuandu konsege atinje kada ektare ho tonelada haat, signifika bele garante produsaun hare bele to’o tonelada 120 ou 130. Bainhira konverte fali ba foos bele atinje entre tonelada rihun 75 no 80. Husi totál númeru ne’e tama iha estimativa ne’ebé Ministériu Agrikultura halo”, nia esplika.
Notísia relevante: MAPPF distribui tratór ba munisípiu ne’ebé poténsia ba produsaun hare
Jornalista: Tomé Amado
Editora: Maria Auxiliadora
