DILI, 13 Agostu 2024 (TATOLI) – Banku Mundiál disponibiliza, ohin, ekipamentu agríkola unidade 164 ba Ministériu Agrikultura, Pekuária, Peska no Floresta (MAPPF) hodi apoiu grupu agrikultór sira atu hasa’e produsaun iha país.
Jerente Sustainable Agriculture Productivity Improvement (SAPIP), Mateus dos Santos, haktuir katak Banku Mundiál nu’udar parseiru Ministériu Agrikultura nian, ne’ebé durante ne’e sempre fó tulun ba ministériu. Ekipamentu unidade 164 ne’ebé Banku Mundiál fó ba MAPPF ne’e konverte ba fundu $667.640.
“Verba ne’e maka utiliza hodi sosa ekipamentu hands tractor 38, mákina ko’a hare 23 no mákina kuda hare 103 atu apoia Ministériu Agrikultura, Pekuária, Peska no Floresta hodi hasa’e produsaun lokál”, nia adianta.
Tuir Mateus dos Santos, ferramenta agrikultura ne’ebé Banku Mundiál disponibiliza ne’e apár ho planu no programa Governu nian ne’ebé iha kompromisu boot katak molok tinan lima remata bele hasa’e produsaun ai-han iha rai-laran, nune’e bele redús foos importasaun.
“Durante tinan barak ita-nia produsaun rai-laran nunka atinje meta ne’ebé iha, tanba produsaun ne’e nia kuantidade sempre tun. Nune’e, tenke iha intervensaun ho ekipamentu modernu sira hodi ajuda ita-nia agrikultór sira hodi hasa’e produsaun hare”, jerente ne’e dehan iha Comoro, ohin.
Responsavel ne’e akresenta katak ekipamentu sira ne’ebé Ministériu Agrikultura simu ona ne’e sei fornese ba grupu agrikultór sira atu uza ba halai natar, maibé sei halo uluk serimónia lansamentu ne’ebé tuir planu realiza iha fulan ida ne’e.
“Ita-nia grupu agrikultór sira sei halo akordu ida ho Ministériu Agrikultura, karik ekipamentu ne’ebé sira uza ne’e maka la tuir nia alvu ka uza fali ba interese seluk, ministériu sei dada filafali hodi fornese fali ba agrikultór sira seluk”, nia adianta.
Ekipamentu unidade 164 ne’e sosa husi empreza Auto Zone Unipesoal Lda. ne’ebé sai nu’udar manán-na’in ba konkursu públiku ne’e no empreza referida sei iha nafatin responsabilidade hodi distribui ekipamentu sira ne’e ba munisípiu sira, inklui sei tau nafatin nia responsabilidade atu halo manutensaun durante tinan ida bainhira ferramenta sira ne’e hetan problema.
Notísia relevante: Ministériu Agrikultura sosa tan tratór unidade 25
Jornalista: Tomé Amado
Editora: Maria Auxiliadora
