DILI, 13 agostu 2024 (TATOLI)—Deputada husi bankada CNRT, Angela Maria Gorubelo, husu Governu liuhusi ministériu kompetente presiza tau atensaun hodi prezerva fatin ka sítiu istóriku iha luta ba libertasaun nasionál iha territóriu ne’e.
Notísia Relevante: CNC prezerva memória pasada hodi identifika sítiu istóriku sira iha TL
“Hato’o sujestaun de’it, tanba loron hirak liu ba ami ba haree fatin istóriku ne’ebé luta-na’in sira fó sira-nia sakrIfísiu no vida tomak, no iha prosesu ne’e barak ema kaer no dadur hetan torturasaun oioin. Fatin sira-ne’e, ohin loron, sai istória moruk ba ita-nia rain maibé ami husu ba Governu fatin sira-ne’e atu bele prezerva nu’udar momentu ida istóriku ba jerasaun sira bele hanoin fila-fali,” nia hato’o liuhusi intervensaun iha reuniaun plenária komisaun permanente iha Parlamentu Nasionál, tersa ne’e.
Liuliu, nia dehan, foka liu ba iha Lautém-Lospalos ne’e iha fatin masakre ne’ebé uluk militár Indonézia sira halo torturasaun ba luta-na’in sira maibé fatin ne’e to’o agora Governu nunka tau atensaun.
Tanba ne’e, nia husu ba Ministériu ba Asuntu Kombatente Libertasaun Nasionál (MAKLN) atu bele prezerva fatin istóriku sira-ne’ebé uluk sai fatin ba ema halo torturasaun ba luta-na’in sira-ne’ebé barak mate to’o agora buka lahetan, atu konstrui monumentu istóriku ida nune’e família ruma ba vizita karik ba iha fatin ne’e.
Antes ne’e, Deputadu FRETILIN, Antoninho Doutel Sarmento, husu parte kompetente atu tau atensaun hodi haree kondisaun infraestrutura no dezenvolve fatin desteradu Ataúro.
Vise-Ministru asuntu Parlamentár, Adérito Hugo da Costa, hateten kona-ba prezervasaun sítiu istóriku hanoin dezde 2015 ne’e harii ona Arkivu Muzeu Rezisténsia Timorense (AMRT) durante ne’e halo hela medida prezervasaun ba sítiu rezisténsia lubun ida iha rejiaun hotu inklui Lospalos ninian ne’ebé iha, seidauk halo maibé halo uluk ona levantamentu.
Iha sítiu istóriku balun halo ona kontrusaun fíziku ba prezervasaun hanesan iha Baucau, Ermera, Manatuto no AMRT kontinua halo levantamentu ba sítiu rezisténsia hodi halo prezervasaun no atu atrai vizitante sira kria infraestrutura, tau espozisaun istória ho fasilidade nune’e rejista prekupasaun husi membru PN.
Notísia Relevante: AMRT no na’in ba abrigu halo diálogu hodi solusiona estatutu fatin istóriku
Jornalista : Nelson de Sousa
Editór : Cancio Ximenes
