DILI, 13 agostu 2024 (TATOLI) -Primeiru-Ministru (PM), Kay Rala Xanana Gusmão, tersa ne’e iha Palásiu Governu Dili, simu vizita Vise-Ministru Parlamentár ba Asuntu Negósiu Estranjeiru (VMPANE) Japaun, Komura Masahiro, hodi ko’alia kona-ba kooperasaun bilaterál nasaun rua nian.
Hafoin enkontru, Xefe Governu Timor-Leste, hateten, vizita ida-ne’e hatudu katak Japaun kontinua reforsa kompromisu atu ajuda Timor-Leste iha área oin-oin, ko’alia mós kona-bá asuntu organizasaun rejionál Association of Southeast Asian Nations (ASEAN).
“Sira halo hela uma maternidade iha Hospitál Nasionál Guido Valadares (HNGV). Ho vizita ida ne’e atu hatudu mai ita katak Japaun la’ós iha ita nia kotu, maibé iha ita-nia sorin hodi bele ajuda ita atu dezenvolve ita nia nasaun,” Xanana Gusmão hateten hafoin enkontru, iha Gabinete Fronteira Terrestre no Marrítima.
Xefe Governu haktuir, Vise-Ministru ne’e nia aman uluk hanesan Ministru Negósiu Estranjeiru Japaun nian ne’ebé iha tinan 1999 bá vizita Xanana Gusmão iha Komarka Cipinang Indonézia.
Husi vizita iha momentu ne’ebá, hahú estabelese relasaun no ihaDezembru 1999 hahú reuniaun dahuluk ho doadór sira husi Japaun atu oferese apoiu mai Timor-Leste.
Tanba ne’e, Primeiru-Ministru konsidera Japaun hanesan nasaun ida ne’ebé sempre prontu atu ajuda Timor-Leste.
“Vise-Ministru mai hodi fó hatene ba ita katak, sira sei kontinua hametin kooperasaun iha área saida de’it. Ita hotu apresia no hatene katak JICA nu’udar doadór ida ne’ebé di’ak tebes, buat barak sira halo ona ba ita halo ho laran tebese,” Xanana tenik.
Iha fatin hanesan,Vise-Ministru Parlamentár ba Asuntu Negósiu Estranjeiru (VMPANE) Japaun, Komura Masahiro, espresa sentimentu kontente tanba bele vizita Timor-Leste no hasoru-malu ho Primeiru-Ministru, Kay Rala Xanana Gusmão.
“Ami ko’alia asuntu barak, ha’u fó sai ami nia intensaun hodi dezenvolve liután kooperasaun sira ne’ebé halo entre Japaun no Timor-Leste. Ami diskute área importante sira hanesan seguransa, ekonomia, interkámbiu entre nasaun rua no reafirma kooperasaun sira ligadu ho vizita Primeiru-Ministru nian ba Japaun iha fulan-Dezembru tinan kotuk,” nia hateten.
Enkontru ne’e Primeiru-Ministru akompaña hUsi Ministru Negósiu Estranjeiru no Kooperasaun, Bendito dos Santos Freitas no Komura Masahiro akompaña husi Embaixadór Japaun iha Timor-Leste, Tetsuya Kimura.
Notisia relevante:KM aprova akordu kontribuisaun millaun $19,6 husi Japaun hodi rekualifikasaun HNGV
Jornalista: Hortencio Sanchez
Editór: Florencio Miranda Ximenes
