DILI, 13 agostu 2024 (TATOLI)–Ministériu Ensinu Superiór Siénsia no Kultura (MESSK) hamutuk ho Universidade Nasionál Timor-Lorosa’e (UNTL) no UN Women, tersa ne’e, lansa programa ‘kampus seguru’.
“Ohin serimónia lansamentu importante tebes ba UNTL ne’ebé relasaun ho asédiu seksuál, sira iha sentru ida UN WOMEN, ne’ebé COICA suporta atu nune’e bele prevene konflitu, liu-liu relasaun ho asédiu seksuál. Tanba UNTL ne’e tau kampus seguru, katak kampus ne’ebé tenke saudável ba estudante no dosente,” Ministru Ensinu Superiór Siénsia no Kultura, José Honório da Costa Pereira Jerónimo, hateten iha UNTL, Caicoli, tersa ne’e.
Nune’e, governante ne’e iha esperansa estudante sira bele aproveita di’ak sentru ne’e, nune’e bele hetan seguransa ba an durante hala’o atividade.
“Sentru ne’e importante tebes, husik ita atu respeita malu, dosente tenke respeita estudante liu-liu estudante feto. Nune’e mós, estudante mane iha obrigasaun atu respeita estudante feto,” nia akresenta.
Notísia relevante : UNTL planeia harii morru protesaun iha tinan 2025
Vise-Reitora Asuntu Estudantil, Lígia Tomás Correia, apresia ho introdusaun programa ne’e nune’e estudante sira bele sente konfortável.
“Ita introdús programa ne’e ho nia efeitu nesesita estudante hodi sente konfortável hodi estuda iha UNTL,” Vise-Reitora dehan.
Programa ne’e hanesan pilotu husi UNTL nia inisiativa inklui universidade privada seluk.
“Pilotu di’ak no prátika di’ak ida-ne’e, nia ezemplu sei partilla ba universidade sira seluk no sentru ne’e sei sai ezemplár ba universidade seluk. Tanba ne’e, ha’u husu ba estudante no dosente hotu-hotu atu kolabora hodi fó susesu ba ita-nia programa inisiativa kampus seguru ida-ne’e,” nia tenik.
Reprezentante COICA, Jinsil Hwang, dehan, hanesan priviléjiu ida bele partisipa iha serimónia lansamentu grupu apoiu kampus seguru no entrega produtu koñesimentu sira.
“Eventu ida-ne’e marka pasu signifikativu ida, nune’e ba oin ita-nia esforsu koletivu sira atu promove ambiente kampus seguru no inkluzivu no ba asuntu importante hanesan Violénsia Bazeia ba Jéneru iha ensinu superiór,” nia katak.
Eventu ohin halo parte iha programa ‘Hamutuk ba Igualdade (T4E) hodi Prevene no Responde ba Violénsia Bazeia ba Jéneru iha Timor-Leste’. Atividade sira rezultadu ida nian mak foka ba transformasaun atitude, hahalok, no norma sosiál sira hodi prevene VBJ. Inisiativa programa kampus seguru aliña ho planu asaun Governu Timor-Leste atu hapara violénsia hasoru feto no labarik-feto sira.
“Hamutuk, ita serbisu ba futuru ida-ne’ebé seguru no ekuitativu liu ba ema hotu. Ha’u-nia esperansa sinseru katak grupu apoiu kampus seguru sei sai fonte apoiu kontinua ba serbisu akonsellamentu VBJ hodi fornese apoiu kontinua no asegura katak indivíduu sira ne’ebé hetan formasaun bele mantein ambiente kampus nian ne’ebé suportivu no seguru, ita bele kontribui ba sustentabilidade ba tempu naruk husi serbisu esensiál sira-ne’e,” nia hateten.
Serimónia ohin nian fornese mai ema hotu no oportunidade furak ida atu selebra rezultadu impaktu husi esforsu koletivu sira.
“Ha’u hakarak hato’o ha’u-nia agradesimentu kle’an ba UN Women, ami-nia parseiru estimadu, no elojia UNTL ba sira-nia kooperasaun ne’ebé di’ak tebes. Susesu no sustentabilidade husi inisiativa ida-ne’e depende ba envolvimentu ativu no kompromisu husi komunidade tomak. Ita-boot nia prezensa iha ne’e subliña importánsia husi envolvimentu komunidade hodi kria ambiente edukasionál neʼebé seguru liu no promove igualdade jéneru iha Timor-Leste,” nia salienta.
Nia espera liuhusi esforsu koletivu bele asegura kampus ne’ebé suportivu no inkluzivu ba ema hotu hodi serbisu hamutuk.
“Ita bele haburas kultura respeitu, seguransa, no igualdade ne’ebé fó benefisia ba membru hotu-hotu husi ita-nia komunidade akadémika,” nia dehan.
Jornalista : Osória Marques
Editora : Julia Chatarina
