DILI, 13 agostu 2024 (TATOLI)—Prezidente Parlamentu Nasionál, Maria Fernanda Lay, hateten PN simu ona submisaun relatóriu ezekusaun Orsamentu Jerál Estadu (OJE) 2024 trismestre daruak (abríl to’o juñu) ho relatóriu dezempeñu trimestre daruak husi Governu.
Notísia Relevante: PN simu ona relatóriu ezekusaun OJE 2024 trimestre dahuluk husi Governu
“Informasaun de’it katak, trismestre daruak 2024 livru rua ne’e to’o ona iha Parlamentu. Ha’u hatun ona ba komisaun permanente ho komisaun C (trata asuntu Finansa Públika), nune’e sira halo relatóriu paresér. Ita espera katak, ita iha oportunidade bele debate kona-ba ezekusaun,” Prezidente PN ne’e hato’o liuhusi reuniaun plenária komisaun permanente iha Parlamentu Nasionál, tersa ne’e.
Tanba ne’e, nia dehan, meza Parlamentu Nasionál (PN) baixa ona relatóriu refere ba komisaun permanente sira atu bele fó ninia relatóriu paresér.
Entretantu, tuir portál Transparánsia husi Ministériu Finansa (MF) ne’ebé Agência TATOLI asesu, tersa ne’e, haktuir kona-ba ezekusaun OJE 2024 ho ninia orijin $2,237,618,655.00, kompromisu sira $120,822,468.22, obrigasaun sira $117,645,942.06, atuál $857,620,490.75, saldu $1,141,529,753.97 no ninia ezekusaun atinje 43.6%.
Enkuantu, papél PN iha ezekusaun Orsamentu Jerál Estadu (OJE) 2024 no lei Enkuadramentu Orsamentál Jerál Estadu no Jestaun Finansa Públika (LEO) estabelese PN iha ninia funsaun hanesan mós atu aprova OJE, apresia no aprova relatóriu ezekusaun OJE no realiza audisaun ho Governu kona-ba ezekusaun OJE no emite paresér kona-ba jestaun finansa públika.
Aleind ene’e, iha rejimentu Parlamentu Nasionál artigu 171 (Aprezentasaun relatóriu) ne’ebé hateten Governu aprezenta relatóriu ezekusaun orsamentál iha tinan fiskál anteriór ba PN dentru fulan tolu depois tinan anteriór ramata.
Jornalista : Nelson de Sousa
Editór : Cancio Ximenes
