DILI, 13 agostu 2024 (TATOLI)—Reitór Dili Institute of Technology (DIT), Salustiano dos Reis Piedade, nota katak artigu balun iha lei baze ensinu superiór ne’ebé Ministériu Ensinu Superiór, Siénsia no Kultura (MESSK) estabelese kontra Konstitusaun Repúblika Demokrátika Timor-Leste (KRDTL).
“Lei ne’e iha artigu 11, iha númeru 1 ne’e hateten katak lian ensinu ne’e tetun no portugés, iha KRDTL mós hateten katak lian ofisiál ne’e tetun no portugés, iha lei baze edukasaun mós rekoñese katak lian ensinu ne’e tetun no portugés, maibé MESSK halo fali lei ida-ne’e iha liña 2 ne’e polémika uituan no hanesan ita kontra tiha fali KRDTL, ne’e dehan lian ensinu ne’e portugés depois tetun ne’e hanesan suporta, ida-ne’e mak hanesan ita halo lei ida kontra fali lei seluk. Ida-ne’e kontra entaun ne’e violasaun, tanba lei baze ensinu superiór ne’e halo bazeia ba lei inan ne’ebé iha, ida-ne’e hanesan dúvida boot no kontra ita-nia KRDTL,” Reitór DIT hateten iha ninia knaar fatin, Manleuana, tersa ne’e.
Nia dehan, nu’udar timoroan sempre apoiu Governu nia desizaun maibé molok halo desizaun tenke tetu didi’ak.
“Ita labele halo lei ida hanesan kazaku ida karik metin loos iha ita-nia isin, book tun-sae mós labele, buat ida laiha flesibilidade ne’e hanesan ita bá tama loos de’it iha komarka, ita tenke iha flesibilidade tanba buat hotu-hotu ne’e iha prosesu, DIT laiha dúvida ba lei baze ensinu superiór ne’e, maibé tenke tetu didi’ak lai tanba iha artigu balun la nesesáriu,” Akadémiku ne’e akresenta.
Notísia relevante : PN aprova proposta-lei Baze Ensinu Superiór iha finál globál
Nune’e, nia husu membru Parlamentu Nasionál (PN) karik iha oportunidade bele tetu fali no rekomenda atu lei baze ensinu superiór ne’e avansa ho númeru 1 no halakon tiha ida númeru 2 ne’e.
“Tanba ami ko’alia beibeik ona maibé sira la rona no sira lakohi tetu, sira bele hamosu lei ne’e maibé sira la presiza hamosu tan artigu 2 ne’e tanba númeru 1 ne’e kobre tiha ona, ita preparadu ho tetun ita hanorin iha tetun, ita preparadu iha portugés ita hanorin iha portugés, la presiza hamosu tan artigu barabarak, ne’ebé DIT la’o tuir no avansa ho númeru 1 ne’ebé iha, katak lian ensinu mak tetun no portugés,” nia reforsa.
Antes ne’e, Prezidente Repúblika (PR), José Ramos-Horta aprova ona iha loron 17 jullu 2024, iha artigu 11 iha númeru 1 hateten katak lian sira husi instrusaun no hanorin iha ensinu superiór maka tetun no portugés.
Agora iha númeru 2 hateten, la ho prejuizu ba dispozisaun sira iha númeru anteriór, prinsipál lian instrusaun, ensinu no peskiza iha ensinu superiór mak portugés, no tetun tenke uza hanesan lian ne’ebé apoia. No iha númeru 3, Estadu tenke valoriza no dezenvolve lian tetun hodi tau iha konsiderasaun ho hanoin atu uza ida-ne’e hanesan lian prinsipál ida ba instrusaun, ensinu no peskiza iha ensinu superiór.
Iha sorin seluk, Prezidente Institutu Politékniku Betano (IPB), Acácio Cardoso Amaral, konsidera, lei baze ensinu superiór ne’e nu’udar avansu di’ak ida ne’ebé universidade hotu-hotu tenke implementa.
“Lei baze ensinu superiór ne’e avansu di’ak ida, agora lei ne’e iha ona ita presiza implementa, lei ne’e fó benefísiu tebes ba universidade sira. Lei ne’e iha ona hein ita implementa no MESSK tenke halo monitorizasaun maka’as atu asegura katak universidade sira tenke kumpre ba lei ne’e. Ne’ebé atu gosta ka la gosta tantu universidade públiku no privadu tenke kumpre. Tanba atu hetan kualidade edukasaun iha futuru tenke investe agora no ba oin nafatin,” nia hato’o.
Ministru Ensinu Superiór Siénsia no Kultura, José Honório da Costa Pereira Jerónimo, hateten, ministériu inisia lei baze ensinu superiór ne’e atu regulariza Institutu Ensinu Superiór (IES) sira.
“Lei baze ensinu superiór ne’e sai lei baze primeiru ba ensinu superiór iha Timor-Leste ne’e atu regulariza ita-nia universidade sira, reitór balun tau kestaun ba língua mais Governu nafatin la’o. Hakarak ka lakohi ensinu superiór sira tenke kumpre tanba ne’e lei baze ensinu superiór nian,” Ministru subliña.
Nia dehan, lian instrusaun ne’e rua de’it mak tetun no portugés, tanba ne’e tenke kumpre.
“Ita tenke hanoin katak portugés la’ós malae sira-nian, maibé rimoroan sira nian no timoroan sira mak tenke promove portugés atu sai língua ida ne’ebé timoroan hotu-hotu tenke ko’alia. Labele dehan portugés ne’e malae nia tanba portugés ne’e tau iha KRDTL nu’udár lian ofisiál, entaun timoroan iha obrigasaun atu apreende lian ida-ne’e. Ita tenke marka diferensa duni iha ASEAN, bainhira ita tama ho portugés diferente ho nasaun sira seluk,” governante ne’e tenik.
Jornalista : Osória Marques
Editora : Julia Chatarina
