DILI, 13 agostu 2024 (TATOLI)—Deputadu KHUNTO, Antonio Verdiál de Sousa, husu Sekretáriu Estadu Floresta (SEF) liuhusi serbisu guarda floresta atu kontrola másimu sidadaun sira-ne’ebé tesi ai ilegál iha ai-laran ne’ebé iha valór ekonómiku la hetan autorizasaun.
Notísia Relevante: SEF sensibiliza ona populasaun iha Dili kona-ba polítika bandu tesi ai arbiru
“Hanesan munisípiu Ermera, daudaun iha kalan boot madrugada komesa ita hasoru fali ai-balok nakonu ho kamioneta to’o balun foin lalais baku-fila iha dalan parte Tibar nian, mak foin identifika katak kareta refere tula ai-ne´ebé koa illegal. Nune´e, ita haree ba loja sira uluk faan ai ne’e komesa ativu fali ona,” nia levanta liuhusi reuniaun plenária komisaun permanente iha Parlamentu Nasionál, tersa ne’e.
Antes ne’e, atuasaun guarda floresta nian iha redús tebes atividade tesi ai ilegál ne’ebé parte ida prevene ba mudansa klimátika ne’ebé ita hasoru.
Tanba ne’e, nia husu ba Sekretáriu Estadu Floresta liuhusi serbisu guarda floresta atu halo kontrolu másimu liután, no presiza aumenta pesoál guarda floresta hodi kobre fatin hotu-hotu.
Vise Ministru ba asuntu Parlamentár, Adérito Hugo da Costa, rejista preokupasaun refere sei envia ba SEF hodi bele tau atensaun.
Jornalista : Nelson de Sousa
Editór : Cancio Ximenes
