DILI, 14 Agostu 2024 (TATOLI) – Funsionáriu na’in-23 husi Ministériu Agrikultura, Pekuária, Peska no Floresta (MAPPF) reforma ona, tanba kondisaun saúde la permite atu kontinua hala’o knaar.
Diretór Rekursu Umanu, Jerónimo Xavier, adianta katak funsionáriu permanente na’in-23 hahú serbisu husi 2007 to’o 2024 no balun serbisu kuaze tinan 17 no seluk tinan 10, maibé tanba fatór idade sira rasik husu reforma.
“Iha 2024 ne’e, ita iha ona funsionáriu permanente hamutuk na’in-23 maka hetan ona reforma, tanba sira ne’e tama ona idade avansada. Sira rasik mak submete pedidu mai ministériu hodi husu reforma”, Jerónimo Xavier dehan iha Comoro, ohin.
Dirijente ne’e esplika katak husi funsionáriu na’in-23 nia prosesu administrativu ba direitu salariál rezolvidu no sira kontinua simu osan kada fulan no iha mós funsionáriu permanente hamutuk na’in-60 mak daudaun tama ona idade reforma.
Maske funsionáriu sira ne’e besik ona idade reforma, maibé seidauk submete pedidu ba ministériu no kontinua hala’o hela sira-nia serbisu hanesan baibain.
“Lei Reforma Obrigatória sidauk implementa, tanba ne’e sira sei kontinua serbisu. Ita fó nafatin oportunidade ba sira hodi hala’o sira-nia serbisu”, dehan.
Daudaun ne’e, funsionáriu ne’ebé serbisu iha MAPPF hamutuk 1682 – permanente 632, kazuál 681 no ajente administrasaun 369.
Notísia relevante: Funsionáriu 40 iha MAPPF tama ona idade reforma
Jornalista: Tomé Amado
Editora: Maria Auxiliadora
