iklan

EKONOMIA, HEADLINE

Funsionáriu 40 iha MAPPF tama ona idade reforma

Funsionáriu 40 iha MAPPF tama ona idade reforma

Diretór Nasionál Rekursu Umanu MAPPF, Hipólito da Costa. Imajen Tatoli/Francisco Sony

DILI, 14 Juñu 2024 (TATOLI) – Diresaun Rekursu Umanu, Ministériu Agrikultura, Pekuária, Peska no Floresta (MAPPF) rejista funsionáriu na’in-40 maka tama ona ba idade reforma.

Diretór Rekursu Umanu, Hipólito da Costa, maski funsionáriu sira ne’e tama iha idade reforma, maibé ministériu seidauk bele implementa prosesu reforma ba sira, tanba seidauk simu orientasaun ida bazeia ba lei atu reforsa prosesu reforma nian.

“Ita kontinua identifika ita-nia forsa traballu sira ne’ebé tama ona idade reforma iha kada diresaun sira. Daudaun ne’e, ita alista funsionáriu balun maka sira-nia idade hakat ona ba reforma. Bainhira Lei Reforma Obrigatória ne’e iha ona, ita bele implementa”, dirijente ne’e dehan iha Comoro, ohin.

Diretór ne’e realsa katak lei ne’e importante bainhira implementa prosesu reforma ba funsionáriu sira tenke liuhusi faze rekoñesimentu ruma, atu sira ne’ebé idade to’o ona bele reforma ho digna.

Funsionáriu permanente iha MAPPF hamutuk 600-resin, ajente administrasaun públika iha 300-resin, no funsionáriu kazuál hamutuk 680. Husi dadus sira ne’e, provizoriamente funsionáriu hamutuk 40 mak tama ona idade reforma.

Iha sorin seluk, funsionáriu permanente husi Diresaun Nasionál Pekuária, Amélia Barbosa, ne’ebé atu hakat ba idade reforma hateten katak, daudaun ne’e, nia iha tinan 57, maibé sei hala’o knaar nafatin tanba kondisaun fízika sei di’ak atu apoia serbisu iha diresaun, maibé kuandu lei iha ona tenke kumpre.

Maski lei ne’e sei iha prosesu diskusaun, maibé Amélia Barbosa mós iha ona planu ba tinan oin atu submete pedidu reforma ba ministériu, nune’e bainhira kompleta tinan 60 sei reforma ho voluntariamente.

Nia halo ida ne’e atu fó fali oportunidade ba jerasaun foun sira hodi ezerse sira-nia papél nu’udar forsa traballu foun hodi tulun serbisu iha Diresaun Pekuária ne’e rasik.

Lembra katak Prezidente Komisaun Funsaun Públika (KFP), Agostinho Letêncio de Deus, informa antes katak proposta Lei Refoma Obrigatória haruka ona ba Governu.

Dirijente ne’e salienta katak depois Governu no Parlamentu Nasionál finaliza dikusaun ba lei referida mak KFP bele halo rekrutamentu ba ajente administrasaun públika foun sira.

Notísia relevante: Membru PN husu KFP aselera prosesu lei reforma obrigatóriu ba FP

Jornalista: Tomé Amado   

Editora: Maria Auxiliadora

iklan
iklan

Leave a Reply

iklan
error: Content is protected !!