VIQUEQUE, 14 agostu 2024 (TATOLI)-Governu liuhusi Sentru Lojístika Nasionál (CLN, sigla portugés), kuarta ne’e, lansa intervesaun merkadu ho foos marka MEKAE hamutuk saku 2,000 iha postu administrarivu Ossú, munisípiu Viqueque.
Iha serimónia lansamentu ne’e, Diretór Diresaun Transporte husi CLN, Tito da Costa, esplika, Governu hala’o intervensaun mai munisípiu Viqueque bazeia ba despaisu husi Primeiru Ministru (PM) no vise Ministru Koordenadór Asuntu Ekonómia ba Prezidente CLN kona-ba intervensaun folin foos iha merkadu sira.
“Ohin ami distribui foos hamutuk saku 2,000 ho totál tonelada 50 mai Viqueque. Ho objetivu atu halo intervensaun ba folin foos ne’ebé sa’e maka’as iha merkadu hodi hakma’an ita-nia inan- aman sira-ne’ebé durante ne’e halerik ba folin foos”, Tito da Costa, hateten ba jornalista sira, iha postu administrativu Ossú, ohin.
Tuir nia intervensaun foos ba kada munisípiu bazeia ba despasu kada munisípiu ida hetan saku 2,000 no CLN sei halo kontinuasaun intervensaun ba folin foos to’o normál.
Tanba, daudaun folin foos iha merkadu ho kada saku ida $18, $19 to’o $20.
“Enkuantu foos ne’ebé daudaun governu halo intervensaun kada saku ho kilogtama 25 ho folin ami $12,5 sentavus”, nia subliña.
Intervensaun folin foos ne’ebé faan iha munisípiu Viqueque sei faan iha postu tolu maka hanesan Ossú, Viqueque Vila no Postu Lacluta.
“Intervensaun foos ne’e ba postu tolu no postu Uatulari no Uatucarbau maka lahetan. Karreta hamutuk unidade 7 maka tula foos mai Viqueque ne’ebé ami sei koloka foos ne’e ba postu tolu. Kona-ba distribuisaun foos saku saku 2,000 ami sei koordena ho parte autoridade,” nia afirma.
Iha fatin hanesan, Administradór Ossú, Feliciano da Costa Guterres, haktuir ho intervensaun Governu nian ba folin foos ne’e bele hakma’an ba komunidade sira tanba agora folin foos sa’e makas iha merkadu.
“Ami husu agradese ba Governu ne’ebé halo intervensaun foos iha ami-nia postu no ha’u koordena ho xefe suku sira atu orienta komunidade sira sosa tanba foos folin saku ida ho $12,05. Kompara ba foos iha merkadu $19 to’o $20. Entaun ho intervensaun ida-ne’e komunidade bele sosa hodi konsumu loron-loron”, nia akresenta.
Nune’e nia prefere ba oin Governu nafatin halo intervensaun foos mai munisípiu Viqueque ho komunidade sira bele asesu no sosa foos husi Governu.
Iha biban ne’e, Komunidade Ossú, Juvita da Silva, sente kontente tanba folin foos ne’ebé Governu faan baratu ho presu $12,50, ne’e ajuda komunidade ho kustu ne’ebé ki’ik.
“Ita haree folin foos iha merkadu karun entaun ami sosa mós sente todan tanba ami povu ki’ik, laiha osan Nune’e ohin ha’u mós aproveita sosa saku rua hodi konsumu. Ho ida-ne’e ha’u rekomenda ba Governu ba oin kontinua faan nune’e atu ami negosiante ki’ik sira bele sosa kotu, se la’e ami sosa foos iha merkadu folin sa’e bei-beik halo ami sosa labele, tanba folin foos iha merkadu boot liu ami-nia rendimentu ne’ebé loron-loron ami hetan”, nia sujere.
Tuir observasaun jornalista Agência Tatoli nota katak foos ne’ebé CLN faan iha área merkadu Ossú la to’o komunidade, nune’e komunidade balun la hetan.
Entretantu lansamentu foos marka MEKAE ne’e lansa direta husi Diretór Transporte no Lojistka CLN akompaña husi administradór Postu Ossu no Polísia Nasionál Timor Leste (PNTL) eskuadra Ossú no autoridade lokál sira.
Notísia relevante: Opozisaun husu CLN kontinua halo intervensaun foos folin baratu to’o área rurál
Jornalista : Vitorino Lopes da Costa
Editór : Florencio Miranda Ximenes
