DILI, 14 agostu 2024 (TATOLI)—Konsensaun eskolár ba Ensinu Sekundáriu Jerál no Ensinu Sekundáriu Tékniku Vokasionál (ESJ-ESTV) daudaun ne’e iha ona faze prosesa kódigu fornesedór iha Ministériu Finansa (MF).
“Banhira sai ona mak transfere tama ba eskola ida-idak nian konta bankária. Tanba ita-nia prosesu administrasaun hotu ona no buat hotu hein de’it mak finansa nasionál,” Diretór Nasionál Sekundáriu Jerál iha Ministériu Edukasaun (ME), Benjamin Fernandes, informa ba Agência Tatoli, iha ninia knaar fatin, Vila Verde, kinta ne’e.
Notísia relevante : Osan konsensaun eskolár sei tama konta bankária eskola iha loron 15 agostu
ME entrega ona prosesu hotu ba MF, nune’e Diretór husu ba kada eskola atu hein prosesu iha MF.
Iha sorin seluk, Diretór Eskola ESJ Fitun Naroman Timor-Lorosa’e (FINANTIL), Aniceto Barlelo, hateten, bainhira osan tama tarde ba konta bankária eskola, maka sei fó impaktu ba atividade eskola.
“Iha loron hirak liubá ami hetan kontaktu, maibé osan konsensaun eskolár to’o agora ami seidauk hetan, seidauk tama iha bankária ne’ebé maka husi ME fó hatene ba eskola sira tenke loke,“ nia haktuir.
Diretór eskola husu ME atu haree asuntu ne’e no trata ho sériu, atu nune’e labele fó impaktu ba iha prosesu ensinu aprendizajen, tanba bainhira osan ne’e tarde nafatin, sei fó impaktu boot ba ezame pasajen ninia, maski tempu ba ezame nasionál no ezame lokál ninia.
Totál estudante iha Eskola ESJ FINANTIL hamutuk 1.700.
Jornalista : Osória Marques
Editora : Julia Chatarina
