DILI, 31 jullu 2024 (TATOLI)—Osan ba konsesaun eskolár ba Eskola Ensinu Sekundáriu Jerál (ESJ) no Ensinu Sekundáriu Tékniku Vokasionál (ESTV) sei tama iha konta bankária eskola iha loron 15 agostu tinan ne’e.
“Ohin hetan ona aprovasaun husi kada munisípiu. Sira iha hotu ona konta bankária nune’e Ministériu Finansa husu Banku Nasionál Komérsiu Timor-Leste (BNCTL, sigla portugés) atu atribui konta bankária ba sira ona. Daudaun ne’e iha faze ida-ne’ebé mak atribui, nune’e ami garante katak to’o loron 15 agostu osan tama ona ba dirijente eskola idak-idak nia konta tanba hetan ona aprovasaun husi Ministra Edukasaun, Dulce de Jesus Soares,” Diretór Nasionál Ensinu Sekundáriu Jerál iha Ministériu Edukasaun (ME), Benjamin Fernandes, informa ba Agência Tatoli, iha ninia knaar fatin, Vila Verde, kuarta ne’e.
Nível ensinu sekundáriu no tékniku vokasionál iha ona konta bankária no hatama hotu ona mai Diresaun Nasionál Ensinu Sekundáriu.
“Ami mós submete fali ona ba Ministériu Finansa, nune’e tinan oin ba oin laiha ona problema kona-ba konsensaun eskolár. Programa ne’e atribui kleur tanba uluk aprovasaun jerál. Uluk osan liuhusi transferénsia públika no tama iha konta edukasaun munisípiu nian,” nia esplika.
Notísia relevante : Konsensaun eskolár to’o ona faze eskola sira foti konta bankária iha BNCTL
Nune’e, nia husu ba dirijente eskola atu utiliza osan konsensaun eskolár ba jestaun administrasaun eskola.
“Kompra nesesidade tenke bazeia ba planu atividade ne’ebé sira halo tiha ona no tuir manuál ne’ebé distribui ona ba sira. Osan uza prepara ezame nian, bele sosa surat-tahan, inklui sosa reparasaun kiik, enkuantu sosa foun labele.
Reparasaun kiik mak hanesan kadeira no meza mak tohar bele selu hodi solda inklui odamatan no janela sira,” nia akresenta.
Diretór dehan, atu kontrola ne’e fásil tanba buat hotu iha nota no resibu, hafoin submete relatóriu anexa.
“Ita garante laiha irregularidade ba utiliza osan konsensaun eskolár tanba Ministériu Edukasaun iha matadalan ne’ebé guia. Bainhira iha irregularidade mak sei hasoru inspesaun eskolár iha kada munisípiu to’o nasionál,” nia tenik.
Totál estudante ESJ tinan 2024 hamutuk 45.298, kompostu husi feto 22.106 no mane 23.192, enkuantu ESTV hamutuk 8.000, kompostu husi feto 3.376 no mane 4.624.
Jornalista : Osória Marques
Editora : Julia Chatarina
