DILI, 14 agostu 2024 (TATOLI)—Sekretaridu Tékniku Administrasaun Eleitorál (STAE) munisípiu Dili desde lansamentu implementasaun sistema biométriku iha fulan-jullu liubá, emite ona kartaun biométriku hamutuk 3.034 ba eleitór sira.
“Ita simu ona pedidu atu fó kartaun biométriku 100-resin kada loron iha edifísiu STAE iha munisípiu Dili. Ema 3.000-resin hetan ona kartaun biométriku to’o ohin loron, ne’ebé husi númeru ne’e, votante foun hamutuk 509,” Diretór relata, iha Caicoli, kuarta ne’e.
Ekipa STAE halo parseria ho Komisaun Nasionál Eleisaun (CNE, sigla portugés) atu kontinua promove atividade sensibilizasaun kona-ba kartaun votante foun (kartaun biométriku).
Kartaun foun ne’e rejista dadus eleitór iha sistema, ho karakterístika hanesan imprime liman-fuan, ho konfigurasaun oin no matan. Marka sira-neʼe bele lee ho dispozitivu neʼebé analiza no sertifika ema-nia identidade, ne’ebé konsidera hanesan prosesu seguru liu do que observasaun vizuál de’it husi nia portadór. Aleinde ne’e mós bele fasilita kria no atualiza baze dadus fásil liu.
Notísia relevante : STAE hahú implementa sistema rejistu kartaun eleitorál ho baze biométriku
Governu inisia kartaun biométriku atu hatene dadus loloos, tanba dadus populasaun ne’ebé Ministériu Administrasaun Estatál (MAE) iha daudaun ne’e la hanesan ho dadus resensiamentu eleitorál nian, tanba ema balun resensia tiha la ba atualiza no ema mate mós la atualiza, nune’e halo númeru nafatin.
Kartaun biométriku hanesan kartaun seguru liu no eletróniku, ne’ebé elementu sira iha futuru sei introdús no bele utiliza eletronikamente ba prosesu eleisaun sira tuir mai. Kartaun biométriku sei substitui kartaun eleitorál, ne’ebé iha deferensa modelu no kustu.
Sistema biométriku mós bele kontribui ba buat ruma ne’ebé akontese, ezemplu, votante ida mak vota ona no tenta vota tan iha fatin seluk maka sistema ne’e bele identifika automátikamente.
Jornalista : Osória Marques
Editora : Julia Chatarina
