DILI, 14 agostu 2024 (TATOLI) – Ministru Negósiu Estranjeiru no Kooperasaun (MNEK), Bendito Freitas, ho Vise Ministru Parlamentár ba Asuntu Negósiu Estranjeiru (VMPANE) Japaun Komura Masahiro, kuarta ne’e, selebra ona akordu kooperasaun, iha ne’ebé Japaun sei apoiu osan hamutuk millaun $ 20,993.10 hodi konstrui Hospitál Nasionál Guido Valadares (HNGV).
“Ha’u reprezenta Governu Timor-Leste hamutuk ho Governu Japaun asina akordu ida kona-ba kontribuisaun ne’ebé Japaun fó mai ita atu halo kostrusaun ba ita nia Hospitál Nasionál Guido Valadares, orsamentu apoiu hotu husi Japaun, ida ne’e apoiu ida ne’ebé importante tebes mai ita tanba ita agora iha hela faze dezenvolvimentu,” Ministru Bendito tenik ba jornalista sira.
Nia dehan, apoiu ne’ebé Japaun fó hanesan meiu ida hodi tulun setór saúde iha Timor-Leste.
“Ita tenke agradese ba Governu Japaun, fiar katak ho apoia ne’e bele dezenvolve ona ita nia infraestrutura iha área saúde,” Ministru ne’e tenik.
Iha fatin hanesan, Vise-Ministru,,Komura Masahiro, hateten, apoiu ne’ebé Japaun fó ba Timor-Leste ho laran tebes no hakarak duni atu apoiu Timor-Leste iha área oioin.
“Japaun nafatin mantein iha nia pozisaun hodi apoiu Timor-Leste nia dezenvolvimentu, ohin ami asina ona akordu iha tempu besik bele halo ona konstrusaun ba HNGV, ita sei halo Ospitál ne’e sai kategoria internasionál,” Komura Masahiro hateten.
Nia dehan, Japaun sei apoiu nafatin Timor-Leste iha área oioin hanesan kapasitasaun rekursu umanu, setór ekonomia, defeza seguransa no seluk tan.
Notísia relevante: EUA-Japaun no Korea Súl apoiu másimu TL nia adezaun ba ASEAN
Jornalista: Hortencio Sanchez
Editór: Florencio Miranda Ximenes
