Kondisaun merkadu aat, Negosiante iha Ossu faan produtu lokál iha estrada ninin
VIQUEQUE, 16 agustu 2024 (TATOLI)- Negosiante sira iha Postu Administrativu Ossu, Munisípiu Viqueque, daudaun ne’e halo atividade negosiu liuliu faan produtu lokál iha estrada ninin tanba kondisaun merkadu aat hela.
Reprezentante Negosiante iha Postu Administrativu Ossú, munisípiu Viqueque, Raimundo Gusmão Guterres, hateten, kondisaun merkadu antiga postu Ossú, munisípiu Viqueque kondisaun aat, nune’e negosiante sira tenke faan sira-nia produtu lokál sira iha estrada ninin.
“Ami komunidade postu Ossú sente triste tebes tanba ita-nia negosiante sira tenke ba faan sira-nia produtu lokál iha estrada ninin. Ida-ne’e risku ba negosiante sira-nia saúde no kompradór sira-nia saúde no risku ba asidente trafegu”, hateten komunidade ne’e ba jornalista sira, iha merkdu Ossú, ohin.
Nia hatutan : “Modo ne’ebé negosiante sira faan iha dalan ninin ita liga ba saúde, tanba rai rahun nakonu ho produtu hirak ne’e no negosiante mós bele hetan impaktu tanba rai rahun sa’e maka’as,” nia afirma.
Tanba ne’e, nia husu ba autoridade lokál no parte seguransa tenke mobiliza negosiante sira ba merkadu anteriór, maske kondisaun aat, maibé tenke uza provizóriu hodi faan produtu lokál, hodi hein Governu halo reabilitasaun merkadu postu ne’e.
Iha fatin hanesan, Negosiante Ossú, Joséfina dos Santos Goncalves, hateten, negosiante sira faan iha dalan ninin tanba kondisaun merkadu aat no fatin atu faan sasan la sufisente ba negosiante ki’ik sira hodi faan sira-nia produtu iha fatin ne’ebé dignu hanesan merkadu.
“Ho razaun sira-ne’e maka ami deside ba faan iha estrada ninin. Maske ida-ne’e sai hanesan risku ba ami-nia vida, maibé ami tenke halo hodi hetan netik osan ruma sustenta ba ami-nia nesesiade loro-loron”, nia lamenta.
Afeta ba ISPA no Diárea
Iha fatin ketak, Xefe Sentru Saúde Ossú, Azevedo da Cruz Amaral, kona-ba negosiante postu administrativu Ossú ne’ebé agora faan modo iha estrada ninin ne’e liga ba ambinte no saúde ida-ne’e la merese.
“Tanba ita haree rai rahun barak kona fali ba modo ne’ebé ita-nia negosiante sira faan, depois negosiante sira faan nahe iha rai fasil atu rai rahun no foer seluk kona modo. Ida-ne’e ha’u sente impaktu tebe-tebes ba ita-nia saúde liuliu kontribui ba moras Infesaun Respiratóriu Aguda (ISPA) no moras diárea”, nia afirma.
Tanba ne’e nia rekomenda ba negosiante sira bele faan produtu, maibé tenke faan ho responsablidade ho ambiente ne’ebé moos no seguru hodi labele fó impaktu ba ema seluk nian vida.
“Ita mós labele fó sala ba ita-nia inan-aman negosiante sira –ne’ebé faan iha dalan ninin. Tanba ita haree mós espasu merkadu Ossú nian rasik ne’ebé kondisaun aat, presiza autoridade no governu ajuda hadi’a merkadu atu negosiante sira labele bazar iha dalan ninin”, nia rekomenda.
Hatán ba preokupasaun ne’e, Administradór Postu Ossú, Feliciano da Costa Guterres, hateten, autoridade postu Ossú fó ano hanoin ba negosiante sira atu labele okupa espasu públiku, maibé negosiante sira kontinua faan iha espasu públiku.
“Kondisaun merkadu Ossú aat duni, ha’u tau ona ba planu períoridade no proposta mós ha’u prepara ona hodi hato’o ba Governu hodi halo reabilitasaun ba merkadu antiga Ossú nian. Ha’u espera tinan oin bele iha orsamentu ruma hodi hadi’a merkadu, nune’e ita nia negosiante sira bele halo negosiu iha fatin dignu”, nia kompromete.
Notisia relevante:Projetu merkadu Marco-Cailaco atinje 79%
Jornalista : Vitorino Lopes da Costa
Editór : Florencio Miranda Ximenes
