OÉ-CUSSE, 15 Agostu 2024 (TATOLI) – Ministériu Agrikultura, Pekuária, Peska no Floresta (MAPPF) eleva koñesimentu tratorista no mékaniku na’in-30 iha Diresaun Servisu Agrikultura, Rejiaun Administrativa Espesiál Oé-Cusse Ambeno (RAEOA) kona-ba jestaun no manutensaun ba tratór sira.
Xefe Seksaun ba Mekanizasaun no Reparasaun Mákina husi MAFPP, Francisco Filipe Gama, hateten formasaun ne’e realiza durante loron rua ho objetivu atu tratorista no mékaniku sira bele iha abilidade atu halo jestaun di’ak ba mákina sira.
“Tanba ne’e mak durante loron rua sira tuir formasaun tantu teoria komu prátika atu ami bele halo diskusaun di’ak liután kona-ba padraun operasionál, nune’e sira bele kumpre, liuliu atu kuída tratór sira”, Fransisco Gama dehan iha salaun agrikultura Oé-Cusse, ohin.
Iha fatin hanesan, Diretór Rejionál Agrikultura, Amaro Efi, konsidera katak formasaun ne’e nu’udar preparasaun ba programa fila-rai nian, nune’e mekániku no tratorista sira bele kria jestaun rasik molok fila-rai agrikultór sira-nia to’os no natar.
“Objetivu husi formasaun ne’e atu aumenta koñesimentu kona-ba jestaun utilizasaun tratór sira, nune’e mós mékaniku sira atu sira bele hatene kondisaun no funsaun tratór ne’e oinsá. Entaun, ita mak husu apoia ba iha nivél nasionál atu mai apoia formasaun tanba kondisaun besi ho ema lahanesan, presiza halo jestaun di’ak”, katak.
Notísia relevante: Tratór tolu iha RAEOA tama prosesu leilaun no 17 kontinua fila-rai
Tratór sira-ne’ebé sei eziste iha Diresaun Rejionál Agrikultura Oé-Cusse hamutuk unidade 21 – ida avaria totál, tolu tama ba prosesu leilaun no 17 mak sei iha atu apoia fila to’os-na’in sira-nia rai.
Jornalista: Abílio Elo Nini
Editora: Maria Auxiliadora
