OÉ-CUSSE, 15 Agostu 2024 (TATOLI) – Diretór Rejionál Agrikultura, Rejiaun Administrativa Espesiál Oé-Cusse Ambeno (RAEOA), Amaro Efi, informa tratór tolu mak tama ona iha prosesu leilaun no 17 mantein fila-rai agrikultór sira-nia.
“Dezde governasaun dahuluk Oé-Cusse iha tratór unidade 21, maibé ida avaria totál no tolu tama ona ba leilaun no tratór 17 ne’e agora di’ak hela no prepara atu apoia ita-nia agrikultór sira hodi fila-rai”, Amaro Efi dehan iha edfísiu Agrikultura.
Notísia relevante: MAP RAEOA identifika kondisaun tratór molok halo leilaun
Kona-ba atividade fila-rai komunidade nian, dirijente ne’e esplika katak Departamentu Agrikultura Bázika Familiár hato’o ona pedidu ba iha Prezidente Autoridade RAEOA, Rogério Lobato, atu prepara ekipamentu, nune’e tratorista sira bele halo ona operasaun iha Setembru ka Outubru nia laran.
“Kaléndariu ita seidauk prepara. Ita hein hela pedidu mai husi tékniku estensionista kada suku, tanba programa fila-rai ne’e sei akontese iha suku Nípani, Costa, Cunha, Lalisuk, Bobokase, Naimeko, Lifau, Taiboko, Suni-Ufe, Bene-Ufe, inklui suku Usitasa’e ho Bobometo parte Noél-Ekat”, nia informa.
Amaro Efi salienta katak bainhira estensionista sira submete ona pedidu ba Diresaun Agrikultura, téknikamente sei analiza pedidu sira-ne’e hodi hatún despaixu, depois sira haree mós kondisaun tratór mak foin bele tulun hodi fila-rai to’os-na’in nian.
Nia esplika katak Governu prepara tratór hodi fila-rai no agrikultór sira mak prepara gazolina, tanba koordenasaun ne’e entre estensionista no to’os-na’in sira. “Programa ne’e la’ós gratuita, maibé kontribui mós husi komunidade sira, liuliu prepara gazolina, tanba Governu apoia de’it tratór no tratotista sira atu fila-rai”, katak.
Notísia relevante: Komisaun D kontinua rekomenda ba MAPPF hadi’a jestaun manutensaun tratór
Ba programa fila-rai iha Oé-Cusse, Diresaun Rejionál Servisu Agrikultura iha ona tratorista hamutuk na’in 20-resin.
Jornalista: Abílio Elo Nini
Editora: Maria Auxiliadora
