iklan

HEADLINE, OEKUSI

Autoridade Oé-Cusse presiza hadi’a estrada ne’ebé kotu iha bairru Sikone

Autoridade Oé-Cusse presiza hadi’a estrada ne’ebé kotu iha bairru Sikone

Estrada ne’ebé kotu iha bairru Sikone.

OÉ-CUSSE, 16 Agostu 2024 (TATOLI) – Autoriddae Rejiaun Administrativa Espesiál Oé-Cusse Ambeno (RAEOA), liuhusi Diresaun Rejionál Infraestrutura (DRI) seidauk halo normalizasaun ba estrada ne’ebé kotu dezde Marsu 2024, iha bairru Sikone, aldeia Fatubija’e, suku Bobokase, sub-rejiaun Pante Makasar.

Benedito Obe, rezidente iha Sikone, lembra katak estrada ne’e kotu tanba kauza husi dezastre naturál, liuliu udan boot no rai-hala’i, nune’e difikulta movimentu transporte no abitante lokál sira atu lori produtu bá merkadu.

Benedito Obe, rezidente iha bairru Sikone.

“Estrada ida-ne’e, komunidade suku rua mak la’o tuir, suku Bobokase no Costa, liuliu [aldeia] Kutete, bairru Nun-Ana atu bá to’o fronteira. Kuandu komunidade atu la’o bá merkadu, sira hakat tuir dalan ne’e susar uitoan. Ne’e duni, ami persiza Estadu atu tau-matan ba estrada ida-ne’e”, Benedito Obe dehan iha aldeia Fatubija’e.

Notísia relevante: Estrada kotu, difikulta komunidade Kutete lori produtu lokál ba merkadu

Tanba autoridade seidauk hadi’a estrada maka abitante sira ho inisiativa rasik hadi’a dalan ne’e, maske ho ekipamentu limitadu, tanba estrada ne’e alternativa atu fó asesu bá suku rua ne’e.

“Momentu ne’ebá ami hato’o ba Obra Públika, liuhusi xefe suku, maibé hein to’o ohin loron seidauk mai hadi’a. Entaun, ami organiza komunidade husi Kutete no Bobokase ho voluntariamente hadi’a”, nia realsa.

Xefe suku Bobokase, Tomás Nesi, dehan depoizde estrada ne’e kotu, nia rasik informa direta ba Diresaun Rejionál Infraestrutura, maibé to’o ohin loron seidauk hadi’a, tanba ne’e, autoridade lokál suku Bobokase ne’e espera iha tempu badak bele normaliza ona.

“Kona-ba estrada ne’e, ami mós la nonok. Sempre informa ba autoridade RAEOA, liuliu Obra Públika maibé seidauk hadi’a. Iha fulan kotuk, komunidade husi suku Costa, liuliu pertense ba Kutete ne’e mak hadi’a voluntariamente, tanba hein prosesu Governu kle’ur liu”, nia lamenta.

Notísia relevante: Xefe suku sira husu Autoridade RAEOA hadi’a estrada ne’ebé estragu

Jornalista Tatoli tenta konfirma ho Diretór Rejionál Infraestrutura Oé-Cusse, Remígio Nunu Sila, relasiona ho asuntu ne’e, maibé laiha fatin tanba hala’o hela serbisu seluk iha Díli.

Estrada ne’ebé kotu iha bairru Sikone.

Antes ne’e, diretór ne’e deklara ona katak atu husu Intitutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE, I.P) hodi normaliza estrada ne’e, maibé depende ba proposta tanba presiza hetan aprovasaun husi Prezidente Autoridade RAEOA kona-ba verba operasionál.

Lembra katak, iha 2023, estrada rurál ne’e hetan ona reabilitasaun husi empreza Lifau Indah Unip, Lda, ho valór kontratu hamutuk $2,623,959.80, orsamentu ne’e autoridade prevee husi Orsamentu Jerál Estadu 2022.

Distánsia ba reabilitasaun estrada rurál ne’e hahú husi suku Bobokase liga bá bairru Kutete, aldeia Mahata, suku Costa, ho distánsia kilómetru 14. Estrada ne’e nia medida metru-lima, kompleta ho valeta, ponte boot ida, ki’ik hamutuk 10 no muru protensaun.

Tuir dadus 2021, totál komunidade iha aldeia Mahata 1.899, komposta husi mane 908 no feto 991, nune’e mós iha suku Bobokase hamutuk 3.105, komposta husi mane 1.592 no feto 1.513, ne’ebé mai husi aldeia Fatubija’e no aldeia Bihala.

Notísia relevante: PM inaugura projetu reabilitasaun estrada kilómetru 14 iha Pante Makasar

Jornalista: Abílio Elo Nini

Editora: Maria Auxiliadora    

iklan
iklan

Leave a Reply

iklan
error: Content is protected !!