CNE introdús prosesu eleisaun munisipál no podér lokál ba komunidade Ossú

VIQUEQUE, 16 agustu 2024 (TATOLI)- Komisaun Nasionál Eleisaun (CNE, sigla portugés), sesta ne’e,  realiza  atividade edukasun sívika hodi introdús prosesu  eleisaun munisipál no lei podér lokál  ba komunidade sira husi suku Loi-Hunu, postu administrativu Ossú, munisípiu Viqueque.

Atividade edukasaun sívika ida-ne’e objetivu atu loke komunidade sira-nia hanoin kona-ba lei eleisaun munisipál  no lei podér lokál  ba desentralizaun administrativu.

“Tanba eleisaun munisipál ne’e sai hanesan fatór importante ida ba munisípiu, nune’e ita hotu-hotu bele konsentra   iha poder lokál no dezentralizasaun administrativa. Atu simu podér lokál no dezentralizasaun administrativa ita presiza iha preparasaun  sira hanesan estrutura autoridade munisipál ne’ebé Governu instala ona iha munisípiu hodi prepara kondisaun mínimu ba munisípiu ida-idak bainhira  atu  simu  poder lokál  no dezentralizasaun administrativu”,   Komisáriu CNE destakadu  munisípiu Viqueque, Olavio da Costa Monteiro de Almeida, hateten ba Agência TATOLI,I.P, hafoin ramata abertura edukasaun sívika, iha sede suku Loihunu, ohin.

Bainhira simu ona  podér lokál  no desentralizasaun administrativa tenke  liuhusi prosesu eleisaun hodi hili orgun reprezentativu asembleia munisipál  ne’ebé kompostu husi deputadu munisipál, Prezidente munisípiu no vise Prezidente hodi deside futuru dezenvolvimentu munisípiu nian.

Bazeia ba lei munisípiu ne’ebé tinan kotuk hetan ona aprovasun mak hanesan Lei Númeru; 22/2021, kona-bá lei eleitorál munisipál no Lei númeru 23/2021 kona-bá lei podér lokal  no dezentralizasaun administrativu.

“Ami  mai hodi introdús  ba ita-nia komunidade hodi partilla lei eleisaun munisipál no podér lokál.  Atu nune’e ita-nia komunidade sira bele hatutan ba ita-nia komunidade sira seluk”, nia afirma.

Iha fatin hanesan, Xefe Suku Loi-Hunu, Filomeno Guterres, agradese ba CNE halo esplikasaun kona-ba prosesu eleisaun munisipál no lei podér lokál  ba komunidade.

“Ha’u sente sosializa ne’e importante ba ita-nia komunidade sira. Maibé ami husu CNE tenke realiza beibeik ba komunidade sira atu sira bele intende prosesu eleisaun. Tanba ha’u sente ida-ne’e foin primeiru ba ha’u-nia komunidade”, nia afirma.

Entretantu, Komadante Eskuadra Polísia Nasionál Timor-Leste (PNTL), Postu Ossú, Inspetór Asistente Polísia, Venseslau Moreira de Oliveira Freitas, husu agradese ba CNE  orgniza atividade hodi partilla  informasaun ne’ebé liga ba eleisaun munisipal no podér lokál ba komunidade Ossú.

“Durante ita hotu hein lei eleisaun munisipal no lei  podér lokál ne’ebé planu sei akontese iha tinan 2025. Karik akontese parte seguransa ami prontu  apoiu eleisaun podér lokál. Ami husu ba joven sira agora tempu ona ita prepra ita-nia an hodi hasoru ba eleisaun”, nia afirma.

Partisipa iha edukasaun sívika ne’e hetan partisipa reprezentante Sekretariadu Igulidade (SEI) munisípiu Viqueque, Diretór Sekretáriadu Tekniku Administrasaun Eletorál (STAE), Funsionáriu CNE Viqueque no  autoridade lokál, veteranu, estudante  komunidade Loi-Hunu hamutuk na’in-120 resin.

Notísia relevante:CNE ho STAE introdús prosesu eleisaun munisipál ba komunidade iha Macadique

Jornalista : Vitorino Lopes da Costa

Editór        : Florencio Miranda Ximenes