DILI, 16 agostu 2024 (TATOLI) – Prezidente Ezekutivu Komisaun Nasionál Juventude Katólika Timor-Leste (CNJK-TL), Francisco Indra do Nascimento Tey Seran, relata katak CNJK-TL fó formasaun fiar nian ba foinsa’e sira liu 300 iha Sede episkopál Lecidere, Dili, atubele hatene no komprende kona-ba importánsia prezensa Papa nia iha nia vizita pastorál iha setembru ne’e iha Timor-Leste.
Ho nune’e komisaun forma ona sesaun ba formasaun no iha formasaun ida-ne’e elabora tema no fahe ba tópiku tolu, ko’alia kona-ba primadu São Pedro nia susesór, biografia no ensinamentu Papa Francisco ninian no ensiklika no ezortasaun ninian no inkulturasaun fiar evenjellu iha kultura Timor-Leste.
“Objetivu mak ita foinsa’e sira prepara sira aan, molok Papa to’o mai ne’e, sira mós hatene ona no komprende no sai referénsia ida sira-nia moris”, Prezidente Ezekutivu Komisaun Nasionál Juventude Katólika Timor-Leste (CNJK-TL), Francisco Indra do Nascimento Tey Seran, ba jornalista sira iha sede episkopál, Lecidere, ohin.
Saserdote ne’e esplika, tuir númeru ne’ebé iha ema 3000 foinsa’e mak ba enkontru ho Papa iha CCD no númeru ne’e hetan orientasaun mai husi uma kreda no Governu. Sira ne’e hotu ita haree ba preparasaun bazeia ba tema vizita Papa nian “Atu imi-nia fiar sai imi-nia kultura” ka “Que a vossa fé seja vossa cultura”.
“Ita planu, ita hotu hatene katak no públiku hatene katak iha loron 9 to’o 11 setembru ne’e Papa Francisco sei mai vizita hodi halo nia vizita pastorál ida, entaun Papa mós hanoin atu enkontru ho joven sira iha Sentru Konvesaun Dili (CCD) iha loron 11 setembru 2024 ne’e,” amu ne’e hateten.
Iha orientasaun husi parte igreja no Governu nian fó konfiansa ba Komisaun Nasionál (CNJKTL), mak sei haree no responsável oinsá atu halibur foinsa’e sira iha territóriu Timor-Leste atu mai enkontru ho Papa.
“Ho nune’e bu’at ne’ebé daudaun ne’e haruka karta eskrita ba parókia, eskola públiku no katólika, grupu movimentu katólika kategoria no federasaun juventude sira atu mai partisipa formasaun. Sira sei mai no ita mós iha rekezitu ida ba sira idade 16 to’o 36”, nia dehan.
João Fernando Cabral hanesan foinsa’e husi Parokia Nossa Señora Oe-Cuse, Orgullu tebetebes praparasaun ba tempu-naruk iha formasaun sira atu bele hakle’an liután koñesimentu kona-ba vizita Papa Francisco nian.
“Tanba ne’e prezensa vizita Papa nian Francisco nian bele hametin fiar nu’udar pesoa joven ida iha Timor-Leste, liuliu hametin ha’u-nia fiar iha Kristu. Tanba ne’e, durante ha’u preparasaun, ha’u envolve iha grupu movimentu katólika atu partisipa iha formasaun sira, tanbasá mak Papa Francisco bele mai vizita no nia vizita bele hakbiit fiar katólika liuliu fiar foinsa’e, tanba ohin loron mundu modernu joven barak lakon nia identidade nu’udar joven”, nia dehan,
Tuir foinsa’e Oe-cusse ne’e katak formasaun sira hanesan ne’e importante tebes atu hodi prepara aan hodi hasoru Sua Santidade.
Entretantu, formasaun ne’e mós hala’o iha kada parókia tuir programa komisaun diosezana hodi fó formasaun ba foinsa’e sira no sarani sira kona-ba vizita pastorál amu Papa mai Timor-Leste.
Jornalista: Jesuína Xavier
Editór: Rafael Ximenes de A. Belo
