DILI, 16 agostu 2024 (TATOLI)–Prezidente Ezekutivu Komisaun Nasionál Juventude Katólika Timor-Leste (KNJK-TL), Francisco Indra do Nascimento Tey Seran, hateten sekretariadu KNJK-TL verifika ona lista juventude 3.000 ne’ebé rejista liuhusi online atu partisipa iha enkontru ho Papa Francisco iha Sentru Konvensaun Dili (CCD, sigla portugés) iha 11 setembru 2024.
Notísia Relevante: Papa Francisco sei hasoru malu ho juventude 3.000 iha 11 setembru
“Daudaun ne’e, ita to’o alvu númeru ne’ebé mak iha ne’e mak 3.000 ona. Agora iha prosesu preparasaun kartaun asesu ba iha CCD ka ID Card hodi fó ba foinsa’e sira-ne’ebé rejista ona,” Prezidente Ezekutivu Komisaun Nasionál Juventude Katólika Timor-Leste (KNJK-TL), Francisco Indra do Nascimento Tey Seran, hateten ba jornalista sira iha sede episkopál Lecidere.
Foinsa’e sira-ne’ebé bele partisipa iha eventu enkontru ho Papa ne’e prienxe rekezitu hanesan iha kartaun eleitoral, fotografia atu hetan kartaun asesu ka ID Card no atinje ona idade entre 16 to’o 35 hodi bele partisipa sorumutu ne’e.
Padre hateten, kartaun ka ID Card ne’e iha kode espesifika ba zona sira-ne’ebé foinsa’e sira sei konsentra iha CCD.
“Zona iha laran iha zona 11 no aumenta mós zona espesiál. Zona 11 ne’e ba ita-nia partisipante sira hanesan kolega joven sira hotu no zona espesiál ba ita nia na’in-ulun sira husi uma kreda no Governu ba tuur iha ne’ebá,” bia dehan.
Iha zona liur nian, nia dehan, hamutuk 13 ne’e sei arekades ka fahe hodi bele tama iha laran atu foinsa’e sira bele partisipa enkontru ho Papa Francisco.
Tuir nia, ekipa delegasaun Vatikanu nian hamutuk ho Governu verifika ona fatin enkontru sira-ne’ebé amu Papa Francisco ba vizita mak hanesan ba Katedrál Dili, rezidensia madre ALMA inklui mós CCD.
Nia dehan, reprzentante foinsa’e sira husu Dioseze Dili, Baucau no Maliana ne’ebé atu hasoru malu ho Papa Francisco ne’e hahú tama iha CCD iha tuku 04h00 madrugada to’o tuku 07h00 dadeersan, tanba enkontru ho Papa ne’e sei la’o durasaun hamutuk oras ida.
Jornalista : Jesuína Xavier
Editór : Cancio Ximenes
