DILI, 26 juñu 2024 (TATOLI)–Vise Koordenadór ba Vizita Papa hosi Igreja no atuál Pároku Igreja Sano António Motael, Pe. Guilhermino da Silva, hateten Papa Francisco hala’o vizita pastorál iha Timor-Leste ne’e, papa sei hasoru malu ho reprezentante foinsa’e Katólika 3.000 iha Sentru Konvensaun Dili (CCD, sigla portugés). Merkadu Lama, iha 11 setembru 2024.
Notísia Relevante: Papa Francisco sei prezide misa solene iha Tasi-Tolu iha 10 setembru
Antes ne’e, komisaun organizadora deside totál reprezentante juventude hamutuk 2.000 maibé tanba númeru joven iha Timor-Leste barak, entaun komisaun dezide foinsa’e sira hamutuk 3.000.
“Ba loron datoluk, Papa sei halo enkontru ho joven sira iha Timor laran iha Sentru Konvensaun Dili (CCD) iha 11 setembru dadeersan. Númeru 3.000 mak sei partisipa enkontru hamutuk ho Papa iha CCD, tanba kestaun fatin entaun ema 1000 ida okupa iha salaun CCD no ema 2.000 sei koloka iha liur hodi akompaña enkontru ne’e liuhusi ekran iha liur,” Pároku Igreja Santo António Motael, Guilhermino da Silva, hateten ba Agência Tatoli liuhosi “Entrevista Eskluziva” ho topiku “Preparasaun Igreja ba Vizita Papa Francisco”, iha Faról, segunda 24 juñu 2024) ne’e.
Nia hateten, buat ne’ebé prepara ona mak fó oportunidade ba joven hotu-hotu, husi ema 3.000 ne’e, parte igreja nian iha grupu kategoriál 17 mak partisipa no seluk grupu jerál sira-ne’ebé eziste iha Timor hetan oportunidade atu hasoru malu ho Papa.
“Komisaun prepara no identifika no sira halo rejistasaun ba tempu hasoru malu ho Papa. Laiha kriteria ba ema na’in-hira, maibé grupu kreda nian sei iha mai hodi kompleta númeru sira-ne’e,” nia dehan.
Iha sorumutu ne’e, nia dehan, laiha tema prinsipál ne’ebé Papa Francisco sei ko’alia ho joven sira, maibé sei ko’alia kona-ba pastorál nian liga ba jovem mia fiar bazeia ba kultura, katak juventude nia fiar tenke sai juventude sira-nia kultura.
Vizita pastorál Papa Francisco iha Timot-Leste
Tuir planu, iha loron 09 setembru 2024: Papa Francisco ho delegasaun to’o iha Aeroportu Internasionál Prezidente Nicolau Lobato, Comoro, Dili, maizumenus iha tuku 12h00, hala’o kedas vizita no hasoru malu ho Prezidente Repúblika, José Ramos Horta, no Primeiru-Ministru Kay Rala Xanana Gusmão, iha Palásiu Prezidensiál Nicolau Lobato, Bairru Pité, Dili. Hafoin ne’e, Papa Francisco ba kedas iha fatin deskansa Nunsiatura Apostólika iha Motael.
Iha parte lorokraik, Papa Francisco sei hala’o vizita Estadu hodi hasoru malu ho Prezidente Repúblika, José Ramos Horta, iha Palásiu Prezidensiál Nicolau Lobato, ne’ebé marka prezensa mós reprezentante líder relijiozu sira hanesan relijiaun Katólika, Musulmanu, Protestante, Hindu, Budha no Khonghucu.
Iha loron 10 setembru 2024, Papa Francisco sei hala’o vizita pastorál hodi vizita labarik orfonatu sira-ne’ebé hela iha kongregasaun Asosiasi Lembaga Misionaris Awam (ALMA) iha Pantai Kelapa, Dili.
Hafoin ne’e, Papa Francisco sei hala’o sorumutu ho bispu, padre-madre sira’no seminarista sira durante oras ida (1) nia laran, iha igreja Katedrál Immaculada da Conceição, Vile verde, Dili.
Iha tuku 16h00 lorokraik, Papa Francisco sei prezide misa solene iha fatin istóriku Tasi-Tolu, hanesan fatin ida uluk ne’ebé Papa João Paulo II vizita no halo misa iha fatin ne’e, iha 12 outubru 1989 liubá ne’e.
Iha loron 11 setembru 2024, Papa Francisco sei hala’o sorumutu ho reprezentante juventude 3.000 iha Senteru Konvensaun Dili (CCD) durante oars ida 91) nia laran. Hafoin enkontru ne’e, Papa Francisco sei ba Aeroportu Prezidente Nicolau Lobato iha Comoro, no sei voo ba Singapura.
Notísia Relevante: Papa Francisco sei vizita Timor-Leste iha 09-11 setembru 2024
Jornalista : Jesuína Xavier
Editór : Cancio Ximenes
