DILI, 16 agostu 2024 (TATOLI)—Konstrusaun koziña iha eskola Ensinu Báziku Sentrál (EBC, sigla portugés) hamutuk 18 iha Manatuto sei hein mandatu diretór foun.
“Diretór foun ne’e la tama estrutura foun, entaun ita bele dehan serbisu sei la la’o no ladún iha kontrolu di’ak. Tanba ne’e mak ami hanoin iha agostu nia klaran, semana ida ka liu, ami hand over tiha diretór foun mak foin ita asina kedas kontratu ba konstrusaun koziña EBC 18 ne’e. Tanba ita atu implementa maibé ita mak haruka pending tiha tanba ho razaun diretór ida agora la kleur iha fali mundansa,” Diretór Servisu Edukasaun munisípiu Manatuto, Patrício da Crus Quintão, informa ba Agência Tatoli, via telefónika, sesta ne’e.
Aleinde ne’e, presiza mós matadalan tanba ne’e hanesan projetu komunitária, nune’e hein prosesu tuir mai.
“Ita hanoin katak karik ita avansa ho estrutura foun ne’e aban bainrua konstrusaun labele la’o. Tanba ne’e hein desizaun tun husi funsaun públika ba diretór foun,” nia akresenta.
Notísia relevante : Projetu komunitáriu: Konstrusaun dapur EBC 18 iha Manatuto seidauk konstrui
Servisu Edukasaun Manatuto aloka $135.000 iha tinan ne’e ba konstrusaun koziña iha Eskola EBC 18.
“Konstrusaun infraestrutura ne’e hodi apoiu programa eskolár iha munisípiu Manatuto inklui EBC Katólika rua ho orsamentu ba kada koziña $7.500, ho totál orsamentu $135.000,” Diretór Servisu Edukasaun Manatuto informa.
Enkuantu, konstrusaun edifísiu Ensinu Pre-Eskolár (EPE) rua oras ne’e tama ona iha prosesu levantamentu dadus hodi halo Bill of Quantity (BoQ).
“Edifísiu rua mak hanesan EPE Hatulelo iha suku Orlalan, postu administrativu Laclubar no EPE 07 de Setembru iha suco Uma Naruk, postu Laclo nian. EPE rua ne’e foin tama iha levantamentu dadus hodi halo BoQ no deside nia orsamentu,” nia tenik.
Diretór Nasionál Infraestrutura no Edukativu iha Ministériu Edukasaun (ME), Hélio Lopes, informa, projetu komunitária tinan kotuk nian ne’ebé iha hela andamentu hamutuk 116. Seidauk konklui tanba implementasaun projetu ne’e iha Governu anteriór no nia kontratu neʼebé la konsege halo, maibé foin realiza kontratu iha outubru 2023 no transferénsia orsamentu hodi realiza iha novembru.
Jornalista : Osória Marques
Editora : Julia Chatarina
