SEFOPE apoia rihun $11 ba grupu auto-empregu tolu iha Oé-Cusse
OÉ-CUSSE, 16 Agostu 2024 (TATOLI) – Sekretaria Estadu Formasaun Profisionál no Empregu (SEFOPE) asina akordu ho grupu auto-empregu tolu iha Rejiaun Administrativa Espesiál Oé-Cusse Ambeno hodi apoia fundu rihun $11.
Sekretáriu Estadu Formasaun Profisionál no Empregu, Rogério Araújo, informa objetivu husi apoiu ne’e atu dezenvolve grupu sira-nia negósiu no hanesan investimentu ba sira-nia aan rasik, nomós kria serbisu ba ema seluk atu kontribui redús taxa dezempregu.
“Tanba saida mak ita apoia, tanba tinan barak ita aloka osan ba iha grupu sira, maibé iha fulan tolu tuirmai ita bá vizita grupu sira-nia fatin mamuk ona no laiha atividade. Entaun, atu garante katak orsamentu Estadu fó ba grupu sira bele kria empregu ba sira-nia aan no tulun fali ema seluk atu serbisu hamutuk ho sira”, Rogério Araújo ko’alia iha otél Ambeno, ohin.
Tanba ne’e nia dehan parte Estadu mós tenke halo kontrolu ida di’ak ba grupu sira-nia atividade, nune’e verba ne’ebé sei atribui ne’e atu haforsa grupu sira-nia negósiu.
“Se la’e kada tinan ita fó nafatin, maibé nia rezultadu atu redús taxa dezempregu iha rai-laran ne’e aumenta beibeik kuandu la kontrola. Tanba ne’e, persiza envolve autoridade lokál sira atu tau-matan hamutuk”, nia dehan.
Governante ne’e fó hanoin ba grupu seluk ne’ebé seidauk hetan oportunidade ba fundu auto-empregu ne’e bele kontinua kompete tan iha 2025.
Iha fatin hanesan, Diretór SEFOPE Oé-Cusse, Mário Muni Salu, esplika katak fundu auto-empregu ne’ebé atribui ba grupu tolu ne’e liuhusi prosesu ida ne’ebé hahú Abríl bainhira SEFOPE simu proposta 38. Iha faze selesaun dokumentu, proposta 13 mak prienxe kritériu no submete ba nasionál atu halo avaliasaun.
FOTO ATUÁL: Asina kontratu entre SEFOPE ho grupu auto-empregu tolu iha Oé-Cusse
Nune’e, iha faze tuirmai, proposta 11 mak hetan avaliasaun husi ekipa no nia rezultadu finál mak Oé-Cusse hetan proposta tolu ne’ebé presiza hetan apoia fundu husi Governu.
Grupu tolu ne’ebé simu subvensaun husi Governu ne’e mak grupu ortikultura husi suku Bobometo, sub-rejiaun Oésilo, grupu rentál ka fotokópia no seluk mak salaun tesik-fuuk husi suku Costa, ne’ebé nia membru liu na’in-lima.
Notísia relevante: SEFOPE halibur ideia hatan ba dezafiu kriasaun empregu iha Timor-Leste
Jornalista: Abílio Elo Nini
Editora: Maria Auxiliadora
