SEFOPE organiza feira edukasaun hodi divulga informasaun ba joven sira iha Oé-Cusse
OÉ-CUSSE, 16 Agostu 2024 (TATOLI) – Sekretaria Estadu Formasaun Profisionál no Empregu (SEFOPE) realiza feira karreira no edukasaun ba estudante ensinu sekundáriu, tékniku vokasionál no ensinu superiór sira iha Rejiaun Administrativa Espesiál Oé-Cusse Ambeno (RAEOA).
Sekretáriu Estadu tutela, Rogério Araújo, hateten objetivu husi feira ne’e atu divulga informasaun kona-ba oportunidade empregu produtivu no dezenvolvimentu karreira ba joven sira, atu atinje futuru brillante liuhusi asesu ba informasaun karreira, rede profisionál, formasaun vokasionál, edukasaun no programa serbisu iha rai-laran no li’ur.
Notísia relevante: SEFOPE apoia rihun $11 ba grupu auto-empregu tolu iha Oé-Cusse
“Nia objetivu mak ohin ita haree estudante sira kuaze 1000-resin mak partisipa. Ida-ne’e orgullu boot, tanba ha’u haree oportunidade bá serbisu iha rai-li’ur, númeru traballór husi Oé-Cusse ki’ik liu kompara ho munisipíu seluk, tanba ladún asesu informasaun”, governante ne’e dehan.
Tanba ne’e, SEFOPE tau prioridade ba Oé-Cusse, liuliu ba estudante finalista sira iha eskola sekundária, nomós sira-ne’ebé remata ona universidade remata, maibé seidauk hetan empregu.
“Tan feira ne’e, atu divulga informasaun ba ita-boot sira atu asesu ba empregu liuhusi formasaun no eskola tékniku vokasionál sira, nune’e bele asesu ba merkadu traballu ida-ne’ebé tuir duni imi-nia hakarak”, nia fó hnaoin.
Governante ne’e fó ezemplu katak joven no estudante barak mak remata ona estudu no balun sei kontinua eskola iha nivel ensinu sekundáriu, sira-ne’ebé inan-aman ekonomia la sufisiente tenke hanoin atu tuir formasaun ruma, nune’e bele hetan serbisu ruma.
Diretór SEFOPE Oé-Cusse, Mário Muni Salu, nu’udar mós Prezidente Komisaun Organizadora ba feira realsa programa ne’e nu’udar polítika prinisipál SEFOPE nian hodi halo akonsellamentu ba joven no estudante sira atu hetan informasaun liuhusi sentru formasaun, emprezáriu, grupu produtivu, universidade, ajénsia dezenvolvimentu, ne’ebé konvida hodi partisipa iha feira ne’e.
“SEFOPE Oé-Cusse konvida instituisaun 20 no husi nasionál mak FDCH, INDMO sentru formasaun Tíbar. Iha feira ne’e, sira-bele hatudu ba estudante no joven sira kona-ba sira-nia atividade”, salienta.
Sekretáriu Rejionál ba Asuntu Administrasaun, André Lao, reprezenta Prezidente Autoridade RAEOA, agradese ba SEFOPE tanba realiza feira ne’e hodi tulun estudante finalista sira hili dalan ba futuru ne’ebé di’ak no loos.
“Ha’u husu ba estudante sira aproveita oportunidade ne’e no vizita grupu sira hodi haree sira-nia kriatividade no rona programa saida de’it, hodi foti desizau katak ha’u atu bá ne’ebé, labele haree tuir kolega, labele haree tuir domin. Ita espera liuhusi feira ida-ne’e Oé-Cusse sei hetan rekursu umanu ida ke di’ak, forte hodi prepara ba polítika podér lokál, tuir programa nasionál sei halo iha 2025 ka 2026”, nia akresenta.
Notísia relevante: FOTO ATUÁL: Asina kontratu entre SEFOPE ho grupu auto-empregu tolu iha Oé-Cusse
Espozisaun ne’e hala’o durante loron rua, sesta-feira no sábadu, partisipa husi estudante hamutuk 1.360 husi sekundáriu jerál no tékniku vokasionál sira neʼebé eziste iha Oé-Cusse.
Jornalista: Abílio Elo Nini
Editora: Maria Auxiliadora
