iklan

DESPORTU, HEADLINE

Atleta Teófilo Freitas despede Governu molok dezloka bá Fransa partisipa jogu Paralímpiku

Atleta Teófilo Freitas despede Governu molok dezloka bá Fransa partisipa jogu Paralímpiku

Atleta Teófilo Freitas hamutuk ho atleta seluk despede Governu molok dezloka bá Fransa, iha salaun MJDAK, sesta (17/08/2024). Imajen/Mídia MJDAK

DILI, 17 agostu 2024 (TATOLI)Atleta husi modalidade atletizmu, Teófilo Freitas no ekipa delegasaun Comité Paralimpic Nacional Timor-Leste (CPNTL) halo despedida ho Governu liuhusi Ministru Juventude Desportu Arte no Kultura, Nélyo Isaac Sarmento, sesta (16/08) molok dezloka bá partisipa iha jogu Paralímpiku ne’ebé sei realiza iha loron 28 agostu to’o 08 setembru 2024, iha Paris-Fransa.

“Eventu ida-ne’e realiza tinan-haat dala-ida no klaru katak kompetisaun mundiál ne’e la’ós fásil, maibé ne’e kualifikadu kada mellór atleta mak partisipa, agradese tanba Timor-Leste mós bele partisipa liuhusi kontijente Paralímpiku,” Ministru Nelyo hateten, hanesan sita husi nota ne’ebé Agência Tatoli asesu, sábadu ne’e.

Notísia relevante : Asian Para Games: Teofilo Freitas oferese medalla osan mutin ba TL

Antigu Sekretariu Jerál Federasaun Futeból Timor-Leste (FFTL) ne’e dehan, Teófilo partisipa ona iha eventu Asian Paragames Xina iha tinan kotuk no konsege hetan medalla, nune’e espera katak nia bele hamosu fali buat foun iha eventu mundiál ne’e.

“Ne’e hanesan oportunidade ida ba prezensa Paralímpiku nian, ne’ebé atu kria ligasaun ho organizasaun Paralímpiku nasaun seluk ba futuru di’ak liután,” Nelyo tenik.

Iha fatin hanesan, Xefe Misaun (Primeru Vise-Prezidente CPNTL), Joãozinho Ferreira da Conceição, agradese ba IX Governu liuhusi Ministériu Juventude, Desportu, Arte no Kultura ba apoio tomak durante preparasaun to’o deslokasaun atleta.

“Agradese ba Governu nia apoiu hotu, ho Governu nia apoiu mak ohin ami arranka bá Paris hodi tuir kompetisaun ne’ebé hala’o tinan-haat dala-ida ne’e, fiar katak ita-nia atleta sei hatudu rezultadu di’ak,” nia otimista.

Tuir oráriu, tékniku sira sei dezloka iha loron 16 agostu 2024, hafoin ne’e kontijente Paralímpiku Timor-Leste sei dezloka iha loron 20 agostu.

Jornalista     : Hortencio Sanchez

Editora          : Julia Chatarina

iklan
iklan

Leave a Reply

iklan
error: Content is protected !!