Asian Para Games: Teofilo Freitas oferese medalla osan mutin ba TL
DILI, 30 Outubru 2023 (TATOLI) – Atleta Paralimpiku Teofilo Freitas susesu iha nia kareira hanesan atletizmu hodi oferese tan medalla osan mutin ida ba Timor-Leste iha jogu internasionál Asian Para Games ne’ebé hala’o iha nasaun Xina semana hira ba kotuk.
“Iha jogu ne’e, ha’u esforsu makas atu hetan medalla osan mean, maibé la konsege no ha’u hetan de’it osan mutin”, Teofilo dehan ba Agência TATOLI, ohin.
Medalla osan mutin ne’ebé Teofilo gaña bainhira kompete iha kurrida Para-Atletizmu mane metru 1500 mesmu nune’e rekord ne’ebé hetan kontinua prestisiozu hanesan mós ho rekord osan mean nian.
Nu’udar timoroan Teofilo orgullu tanba bele oferese tan medalla ba Timor-Leste maske ida de’it.
Tanba ne’e, Ministru Juventude, Desportu, Arte no Kultura (MJDAK), Nelio Isaac Sarmento parabeniza atleta paralimpiku Timor-Leste na’in-11 ne’ebé fila ona husi Asian Para Games.
“Ita tenke esportivu katak respeita regra hothotu, lakon ka manan viva nafatin, ha’u hato’o parabens ba ita hotu tamba reprezenta Timor-Leste iha Jogu Asian Para Games”, Ministru Nélio dehan.
Governante ne’e enkoraja ba atleta paralimpiku no federasaun sira labele triste ho rezultadu maibé buka aprende.
“la’os kona-ba manan ka lakon maibé importante tebes mak imi-nia prezensa iha fatin ne’e, oinsa imi aprende atu sai di’ak liután, ho esperiénsia boot sira haree rasik kondisaun no fasilidade iha ne’ebá atu ita sama iha ita-nia rain haree rasik kondisaun ne’ebe di’ak liután tuir mai. Liuliu ba imi-nia federasaun ida-idak, ita labele triste tamba ne’e sai hanesan buat foun ida mai ita atu aprende jogu foun, importante mak ita-boot sira fiar aan. Labale para treinu maibé book aan nafatin, hatoman aan hodi nune’e kompetisaun tuir mai toman tia ona”, nia dehan.
Iha okaziaun ne’e, Ministru kongratula Teofilo Freitas ho atleta paralimpiku sira konsege lori medalla osan mutin ida mai Timor-Leste.
“Parabens ba Teofilu Freitas tamba bele manan ona iha Asian Para Games no hetan ona medalla, iha tempu liubá no agora no nafatin esforsu para hetan barak liután tuir mai. Ba ita boot sira parabens ba imi tamba imi bele tuir ona iha Asia Games ho rezultadu ne’ebé di’ak nu’udar timoroan hatudu ona imi nia jogu iha internasionál, ha’u fiar katak imi sei hadia no halo di’ak liután”, Nélio nia.
Asian Para Games ba edisaun dalima sei realiza iha tinan 2026 iha sidade Aichi, Nagoya, Japaun.
Atleta paralimpiku ne’ebé partisipa iha Asian Para Games Hangzhou Xina mak hosi modalidade Para-Atletizmu Teofilo Freitas, Abel de Jesus, Domingos da Costa no Domingos Pereira Lobato.
Modalidade Para Tenis meza mak Pascoela dos Santos Pereira, Domingos Talo Mau, Bernardo de Carvalho, Paulo da Silva Neves ho Liliana da C. S. Mesquita no hosi Para-Powerlifting (hit besi) hanesan Silveiro Martins ho Antonio J. A. Serrão, enkuantu, delegasaun CPNTL nain-14 kompostu hosi xefi misaun, ezekutivu CPNTL, ofisial no treinador no ofisial ida husi MJDAK.
Atleta sira ho delegasaun fila ona mai Timor-Leste ho aviaun Citilink mais ou menus tuku 12:00 otl no simu direta hosi Ministru Nélio Isaac Sarmento.
Jornalista: Hortencio Sanchez
Editór : Zezito Silv
