VIQUEQUE, 19 agustu 2024 (TATOLI)- Diretór Servisu Saúde Munisípiu Viqueque, Aljacsono S. Maia, informa, Servisu Saúde Munisípiu Viqueque finaliza ona manutesaun ba karreta ambulánsia unidade haat husi sentru saúde Lacluta, Ossú, Uatucarbau no Viqueque.
“Iha fulan kotuk liu ba ita-nia karreta ambulánsia husi sentru saúde haat mak avaria hanesan Sentru Saúde Uatucarbau, Viqueque Vila, Lacluta no ambulánsia sentru saúde Ossú, ita halo ona manutesaun ba ambulánsia sira-ne’e ambulánsia sira-ne’e ita koloka fila-fali ba kada sentru sira hodi ajuda ita-nia komunidade sira”, hateten, Aljacsono S. Maia, ba Agencia TATOLI,I.P iha postu Viqueque Vila, ohin.
Nia dehan, prosesu halo manutesaun ba karreta ambulánsia ne’e kle’ur tanba hein tenderizasun ba empreza manutensaun karreta ambulánsia ne’ebé hala’o iha nasionál.
“Manutensaun foin lalais ne’e tanba prosesu tenderizasaun. Maibé ita iha karreta ambulánsia DHS Viqueque nian mak fó apoiu hodi transporta ita-nia pasiénte sira-ne’ebé moras”, nia afirma.
Iha fatin seluk, Xefe Sentru Saúde, Postu Administrativu Ossú, munisípiu Viqueque, Azevedo da Cruz Amaral, haktuir, karreta multifunsaun ba Sentru Saúde Ossú ne’ebé hetan asidente iha fulan kotuk hetan ona manutensaun hodi fó atendimentu ba komunidade Ossú.
“Ami-nia karreta ambulánsia multifunsaun ne’e hetan asidente iha fulan kotuk liubá, iha suku Builale, halo ona manutesaun. Nune’e daudaun ne’e ami utiliza halo fila-fali operasaun kuaze fulan ida resin ba atendementu ita-nia komunidade sira-ne’ebé moras iha área rurál sira”, nia afirma.
Notisia relevante:Deputada membru komisaun F husu MS aumenta ambulánsia ba sentru saúde sira
Jornalista : Vitorino Lopes da Costa
Editór : Florencio Miranda Ximenes
