F-FDTL no PNTL preparadu garante seguransa ba vizita Papa Francisco
DILI, 20 agostu 2024 (TATOLI) – Xefe Estadu-Maiór Jenerál FALINTIL-Forsa Defeza Timor-Leste (F-FDTL), Tenente Jenerál Falur Rate Laek, hateten, F-FDTL no Polísia Nasionál Timor-Leste (PNTL) harii ho konstante konfiansa no amizade hodi proteje no defende ita-nia povu no garante fó seguransa másimu ba vizita Papa Francisco.
Sua Santidade Amu Papa Francisco vizita Timor-Leste iha loron 9 to’o 11 Setembru.
“Forsa rua iha misaun importante atu asegura vizita importante sira ne’ebé sei akontese iha tempu badak, hanesan vizita Sekretáriu Jerál ONU nian, vizita Sua Santidade Papa Francisco no Alta Entidade sira seluk ne’ebé vizita Timor-Leste iha selebrasaun importante loron nasionál sira hanesan Konsulta Populár no Loron INTERFET nian,” Komandante Falur hateten iha Kuartél Jenerál Fatuhada Dili, tersa ne’e.
Tenente Jenerál ne’e dehan, koordenasaun di’ak no respeitu ba malu iha instituisaun rua ne’e nia laran integradu, nune’e sai ezemplu profisionalizmu no servisu ne’ebé onestu, integridade morál no pesoál ba sosiedade.
“Vizita sira ne’e ho importánsia boot ba ita-nia rain, no teste ida ba ita-nia instituisaun rua nia kbiit atu garante trankuilidade. Iha sentidu ida-ne’e, ha’u hakarak aproveita oportunidade hodi apela ba setór hotu-hotu sosiedade nian, inklui organizasaun arte marsiál no rituál sira, organizasaun naun-governamentál sira no personalidade hotu-hotu atu kontribui ba susesu hasa’e Timor-Leste nia naran di’ak iha komunidade internasionál nia oin,” nia tenik.
Falur mós husu ba parte hotu atu mantein no hamoris importánsia husi faktu istóriku sira-ne’e no transmite ba jerasaun sira iha futuru, reforsa sentidu patriotizmu no valór sira liberdade nian, dame no solidariedade.
“Ho konfiansa no fiar ne’ebé ita tau iha ita-nia Forsa Armada nia kapasidade, ita iha serteza, nu’udar povu, katak, sirkunstánsia saida de’it, F-FDTL sei prezente nafatin hodi estabelese orden, mantein kalma, apoia ita-nia povu no defende integridade territorial,” Falur promete.
Notísia relevante: PNTL labele tolera grupu balun perturba orden públika iha vizita Papa Francisco
Jornalista: Hortencio Sanchez
Editór: Florencio Miranda Ximenes
