Komunidade Bahalara-Uain inisiativa komemora loron FALINTIL hodi fó onra ba eroi sira
VIQUEQUE, 20 agostu 2024 (TATOLI)-Komunidade ho autoridade suku Bahalara-Uain, Postu Administrativa Viqueque Vila, munisípiu Viqueque inisitiva komemora loron FALINTIL ba dala-49 (20 agostu 1975-20 agostu 2024) hodi fó onra ba éroi sira ne’ebé luta ba libertasaun nasionál.
Iha komemorasaun ne’e, Komadante Polísia Nasionál Timor Leste (PNTL), Superitendente António Rego Fernandes, hateten, selebrasaun ba loron FALINTIL ba dala-49 importante ba istória luta libertasaun nasionál nian.
“Ohin ita komemora ita-nia pasadu tinan 1975, iha momentu 20 agostu akontese hodi hamoris liman kroat povu timór nian no liman kroat nasaun. Ba komemorasan ida-ne’e ita atu hanoin hikas ba ita-nia sofrementu pasadu ba luta hasoru invasór sira. Ba komemorasaun 20 agostu ida-ne’e buat importante tolu ita-nia pasadu, futuru no prezente”, hateten Superintendente António Rego Fernandes, iha ámbitu komemorasaun loron 20 agostu, iha suku Bahalara Uain, postu Viqueque Vila, ohin.
Komadante PNTL munisípiu Viqueque ne’e haklaken, hanoin pasadu ba luta 1975 no hamoris FALINTIL hodi luta kontra inimigu sira, maske difisil, maibé luta na’in sira ho aten-berani dehan mate ka moris ukun rasik an.
“Nune’e, iha era ukun an ne’e mai ita hamutuk hodi haree no kontribui ba dezenvolvimentu liuhusi kontribui ba seguransa hodi kria pás no establidade, atu nune’e dezenvolvimentu mai iha ita-nia munisípiu la’o susesu”,nia sujere.
Iha komemorasaun ne’e, Komandante PNTL ne’e husu ba mós ba joven sira hanoin nafatin luta na’in sira nian terus, mate no balun lakon to’o agora seidauk hetan tanba hakarak ukun rasik aan, nune’e joven sira presiza banati eroi sira luta ba rai ida-ne’e.
“Ha’u husu agradese ba komunidade suku Bahalara Uain ne’ebé mak iha inisiativa organiza malu, hodi komemora loron FALINTIL iha ita-nia nunisípiu ne’ebé la’o ho susesu”, nia agradese
Iha biban ne’e, Xefe suku Bahalara Uain, Angelo N. dos S.D.L Pinto, haktuir, suku Bahalara Uain inisiativa komemora loron importante ne’e tanba hetan suporta husi veteranu Bahalara Uain, komunidade no joven sira.
“Objetivu ba komemorasaun ida-ne’e ita atu festeza loron FALINTIL no anima ita-nia komunidade sira liuhusi ativade desportu. Tanba ne’e, ohin ita hamutuk iha suku ida-ne’e hodi komemora ita-nia eroi sira-nia loron ne’ebe uluk luta ba ita-nia independésia”. Nia hato’o.
Komemorasaun ne’e hetan kontribuisaun finansieiru husi veteranu suku Bahalara Uain, funsionáriu, negosiante no joven sira husi suku Bahalara Uain ho totál hamutuk rihun $90-resin.
Iha komemorasaun loron FALINTIL ne’e realiza atividade jogu futeból Mau Lari Cup, voliból, sa’e bua, dansa kultura, dada tali, sertame, poizia no serimónia hasa’e bandeira RDTL no banderia FALINTIL iha suku Bahalara Uain.
Entretantu, komemorasaun loron FALINTIL ne’e hetan partisipasaun másima husi kominidade Bahalara Uain, suku viziñu hanesan suku Luca, Bibileo Diretór munisípiu Viqueque, Administradór postu Viqueque Vila, veteranu, profesór, estudante no hetan seguransa husi PNTL munisípiu Viqueque.
Notísia relevante:PR Horta: FALINTIL iha Timoroan tomak nia fuan no memória
Jornalista : Vitorino Lopes da Costa
Editór : Florencio Miranda Ximenes
