VIQUEQUE, 20 agustu 2024 (TATOLI)-Ministériu Agrikultura Pekuária, Peska no Floresta (MAPPF) hamutuk povu agrikultór sira, segunda ne’e, kolleta hare variedade nakroma ho ektare 208, iha suku Uaitame, postu administrativu Uatulari, munisípiu Viqueque.
Iha serimónia kolleta hare ne’e, Ministru Agrikultura Pekuária, Peska no Floresta (MAPPF), Marcos da Cruz, hateten, Governu kolleta hare ektare 208 hodi fó testamuña katak agrikultór Uatulari halo natar ba epoka 2024 produsaun ne’ebé di’ak. Implementa iha demonstrasaun área kuda hare (Demo Area) husi totál 208 ektare ne’ebé utiliza adubu organiku (POC Nasa, Super Nasa no Hanmonik) ba primeiru epoka iha área natar utiliza irrigasaun Bebui.
“Antes ne’e, irrigasaun Bebui aat natar kuaze mil ektare resin mak sai abandona. Nune’e, ita hahú halo konstrusaun ba irrigasaun Bebui iha mandatu Governu da-haat tinan 2007, ramata konstrusaun tinan 2012. hafoin , ita-nia agrikultór sira halo ona natar sira-ne’ebé abandona tinan naruk komesa halo fali ona natar hodi produsaun hare to’o agora. Ohin ita mai fali haree natar sira-ne’e prodús hare, ha’u sente kontente la’ós ektare 208 de’it, maibé povu tomak halo natar hotu”, Ministru ne’e hateten ba jornalista sira, hafoin ramata kolleta hare, iha suku Uaitame, segunda (19/08).
Governante ne’e afirma, agrikultór sira iha postu administrativu kontinua prodús hare ba komsumu no hodi atinje Estadu no Governu nian mehi kona-ba hasa’e produsaun rai-laran hodi redús importasaun.
“Rezultadu produsaun hare ba epoka ida-ne’e hatudu di’ak. Nune’e ha’u husu ba agrikultór sira kontinua hasa’e produsaun hare, se bele kada tinan ida halo natar dala rua. Alende halo natar bele kuda mós modo iha natar laran. Tanba ita-nia dezenvolvimentu ba futuru halo toos no natar muda ba mai ne’e ita buka prevene, rai ida ne’ebé ita uza ba halo natar ne’e, ita uza fali toos. Ita labele halo toos iha foho lolon sira hodi fó impaktu erosaun”, Ministru ne’e akresenta.
Nune’e, MAPPF sei kontinua promove agrikultór sira oinsa utiliza adubu organiku atu rai sai bokur hodi halo produsaun sa’e.
“Ha’u enkoraja povu agrikultór sira kontinua hatudu badinas hodi halo natar atu kada tinan halo produsaun dala rua, atu dezenvolve setór agrikultura iha Timor Leste,” nia enkoraja.
Iha fatin hanesan, Xefe suku Uaitame, Marcelino P. Alves, husu agradese ba Governu liuhusi MAPPF ne’ebé durante ne’e akompaña agrikultór sira hodi hasa’e produsaun hare.
“Ha’u-nia agrikultór sira-nia rezultadu produsaun di’ak, tanba hetan apoia adubu hodi utiliza ba natar. Ha’u husu ministériu kontinua akompaña ita-nia agrikultór hodi hasa’e produsaun hare”, nia afirma.
Entretantu, Komunidade suku Uaitame, Salvadór Fernandes, sente kontente tanba epoka ida-ne’e utiliza adubu organika no hetan rezultadu produsaun hare ho di’ak.
“Ha’u sente orgullu ba rezultadu hare iha tinan ida-ne’e. Ba oin ami kontinua haka’as an hodi hasa’e produsaun hare. Ami nafatin husu Governu atu akompaña ami no tulun nafatin ai-moruk sira, atu ami bele uza rega ba hare”, nia suejere.
Partipa iha kolleta hare iha suku Uaitame hetan partisipa husi autoridade lokál husi suku neen, grupu agrikultór, Polísia Nasionál Timor Leste (PNTL) no komunidade agrikultór suku Uaitame.
Notisia relevante: MAPPF no CCI-TL kolleta hare ektare ida iha Ossú
Jornalista : Vitorino Lopes da Costa
Editór : Florencio Miranda Ximenes
