PN hato’o felisitasaun ba loron FALINTIL da-49

DILI, 20 agostu 2024 (TATOLI)—Parlamentu Nasionál (PN) felisita komemorasaun loron Forças Armadas da Libertação Nacional de Timor-Leste (FALINTIL) ba da-49 (20 agostu 1975-20 agostu 2024).
Notísia Relevante: FRETILIN konsidera komemorasaun loron FALINTIL fó onra ba eroi-mártir sira
“Hato’o ha’u-nia parabéns, lori naran povu ba loron FALINTIL ne’ebé komemora ohin,” Prezidente Parlamentu Nasionál, Maria Fernanda Lay, hato’o iha reuniaun plenária komisaun permanente iha PN, tersa ne’e.

Deputadu FRETILIN, Antoninho Bianco, hato’o agradesimentu ba erói no mártir sira liuliu FALINTIL ne’ebé ohin komemora tinan-49 no agradese mós ba membru FALINTIL ne’ebé kontinua hala’o serbisu hanesan Forsa Defeza Timor-Leste no onra ba sira-ne’ebé husik ona mundu ne’e tanba luta ba libertasaun ba rai no povu ne’e.
“Ita louva ba sira-ne’ebé kontinua hatutan prosesu luta defende soberania rai ne’e, liuhusi Forsa Defeza Timor-Leste, nune’e mai ita banati nafatin espíritu sira-nian. Nune’e, iha loron espesiál FALINTIL, ita hein katak espíritu sira-nia bele horik ho ita atu hatutan luta libertasaun ba rai ne’e no povu nia moris di’ak,” nia dehan.
Deputadu PLP, Helder Freitas “Kamarudi’’, lori estrutura PLP husi nasionál to’o baze nia naran hato’o felisitasaun ba aniversáriu loron asuwain FALINTIL ba dala-49 hamutuk ita dignifika ita-nia funu na’in sira-nia luta serbisu makas hodi lori povu ba moris di’ak ho integridade, badinas, seridade, disiplina no responsabilidade, iha ita-nia luta ba libertasaun povu husi ki’ak no mukit.
Deputadu PD, Manuel Henrique Noronha, reprezenta bankada Partidu Demokrátiku parabeniza ba aniversáriu loron istóriku FALINTIL ne’ebé komemora ohin, no fó onra no glória ba erói no eroina ne’ebé sakrifika sira-nia aan tomak luta hodi liberta rai husi okupasaun.
Deputadu CNRT, Duarte Nunes, lori bankada CNRT hato’o felisitasaun ba loron FALINTIL ne’ebé kompleta tinan 49 no durante tinan 24 nia laran ne’e, ema barak mate nune’e tenke fó onra no gloria ba sira tanba sira-nia esforsu ho sakrifísiu hodi bele manán ukun aan.
Jornalista : Nelson de Sousa
Editór : Cancio Ximenes

