DILI, 05 agostu 2024 (TATOLI)—Deputadu FRETILIN iha Parlamentu Nasionál (PN), Antoninho Bianco, konsidera komemorasaun loron FALINTIL ba da-49 (20 agostu 1975-20 agostu 2024) ne’ebé la kle’ur tan Timor-Leste sei komemora nu’udar momentu hodi fó onra ba luta-na’in, erói no mártir ne’ebé fó aan tomak ba luta libertasaun to’o nasaun hetan independénsia.
Notísia Relevante: Komemorasaun konsulta populár konsolida juventude nia espíritu nasionalizmu-patriotizmu hateke ba oin
Nia haktuir, hahú harii iha 15 agostu iha Aisirimou-Aileu nu’udar sásin moris FALINTIL depois prosesu ne’e la’o to’o 20 agostu mosu golpe kontra golpe, hafoin iha konstituisaun hakerek, loron 20 agostu nu’udar loron FALINTIL.
FALINTIL iha tanba FRETILIN no FRETILIN uluk halo rezisténsia ba iha aí-laran, hafoin restaurasaun independénsia RDTL ne’e naran FALINTIL troka ba FALINTIL-Forsa Defeza Timor-Leste (F-FDTL).
“Tanba ne’e, ita komemora 20 agostu agora, ita fó onra ba ita-nia FALINTIL sira, eroi no mártir sira-ne’ebé husik rai ne’e, sira luta la’ós atu hetan pozisaun maibé sira luta tanba defende lia lo’os no justisa mak ohin loron hatutan. Tanba ne’e mak ita valoriza sira-nia loron erói no martir sira-ne’ebé mate hanesan forsa defeza,” nia hateten ba jornalista sira iha sala Bankada FRETILIN iha PN, segunda ne’e.
Atu valoriza sira, nia dehan, iha komemorasaun loron boot saida de’it ne’e iha órgaun soberania haat (4) no iha administrasaun públiku tomak atu serbisu serbi ba povu.
“Tanba ne’e, ita valoriza sira liuhusi ita serbisu hodi serbí ba povu,” nia dehan.
Membru husi órgaun lejislativu ne’e felisita membru FALINTIL-Forsa Defeza Timor-Leste (F-FDTL) ba loron espesiál ne’e no fó korajen nafatin atu sira hatudu nafatin firmeza prinsípiu hanesan forsa defeza Timor-Leste hodi hala’o sira-nia kna’ar atu serbí povu defende nasaun.
Nia husu ba sidadaun hotu atu fó kontribuisaun hodi serbisu hamutuk, atu nune’e serbisu halo libertasaun ba Timor-Leste liuhusi prosesu dezenvolvimentu ne’ebé la’o daudaun.
Deputadu CNRT, Patrocínio dos Reis Fernandes, antesipadamente kongratula ba komemora loron FALINTIL iha 20 agostu 2024 ne’e.
Ba transformasaun FALINTIL ba F-FDTL, Deputadu husi Bankada Governu ne’e, hein katak ho polítika tomak Estadu nian hatuur tiha ona iha programa Governun nian agora ba tinan lima hodi dezevolve liután instituisaun F-FDTL sai profesionál liután.
Notísia Relevante: Sekretáriu Jerál ONU konfirmadu partisipa komemorasaun loron konsulta populár
Jornalista : Nelson de Sousa
Editór : Cancio Ximenes
