DILI, 20 agostu 2024 (TATOLI)—Xefe bankada CNRT iha Parlamentu Nasionál (PN), Duarte Nunes, husu ba Governu no Estadu atu tau atensaun ba veteranu balun ne’ebé ho kondisaun defisíénsia mental ne’ebé iha tempu ukun aan ne’e la hetan atensaun.
Notísia Relevante: Membru PN husu MAKLN fó atensaun ba veteranu kondisaun defisiénsia mentál
“Ha’u hatene, barak mak sei moris kondisaun saúde dalaruma presiza atensaun husi Governu. Nune’e, sira-nia moris restu ne’e bele kmaan bainhira hetan atensaun husi Governu. Tanba sira-nia sakrefísiu merese ita hotu nia atensaun,” nia hato’o liuhusi reuniaun plenária komisaun permanente relasiona iha ámbitu komemorasaun loron FALINTIL ba da-49 (20 agostu 1975-20 agostu 2024), iha Parlamentu Nasionál, tersa ne’e.
Tanba ne’e, nia hato’o felisitasaun ba loron FALINTIL ne’ebé kompleta tinan 49 no durante tinan 24 barak mate, nune’e tenke fó onra no gloria ba sira tanba sira-nia esforsu ho sakrifísiu mak Timor-Leste bele hetan ukun aan.
Nia husu tulun atu timoroan ida-idak bele hatutan nafatin hodi hetan buat ne’ebé ema hotu mehi mak luta ba povu nia moris di’ak
“Loron istóriku no espesiál FALINTIL nian atu ita halo reflesaun oinsá ita ne’ebé sei moris, hamutuk ita bele nafatin hala’o serbisu ba rai ida-ne’e hanesan uluk sira fó sira-nia vida,” nia hateten.
Vise Ministru ba asuntu Parlamentár, Adérito Hugo da Costa, hateten kona-ba atensaun Estadu nian ba sobrevivente no asswa’in sira-ne’ebé sei moris ho sira-nia idade ne’ebé avansadu ona, hanoin desde Governu dahuluk to’o mai ohin loron tau hela kestaun ne’e importante.
Iha parte seluk, apoiu sosiál nian nafatin tau importante ho konsiderasaun katak erói no asswa’in sira-ne’ebé sakrifika sira-nia aan tomak iha luta libertasaun no ohin loron ukun-aan ho sira-nia idade avansadu, tanba ne’e apoiu sosiál sira Governu kontinua tau atensaun liuliu mós sira faluk no oan ki’ak sira,
Governu mós fó bolsa estudu hanesan jestu seluk ne’ebé Estadu halo atu kontinua fó onra no gloria ba sira-ne’ebé mate ona, maibé ba sira-ne’ebé sei moris no faluk ho oan ki’ak sira atu kontinua iha atensaun husi Estadu.
Jornalista : Nelson de Sousa
Editór : Cancio Ximenes
